«ЖАСЫМДА ҒЫЛЫМ БАР ДЕП ЕСКЕРМЕДІМ»
Қазіргі уақытта білім-ғылым адам өмірінде басты рөл атқаратын маңызды құндылық. Өйткені, дана бабаларымыз айтып өткендей: «Білімдіге дүние жарық. Білімсіздің күні ғаріп».
Білім – өз иесіне ғана емес, білімді адамның айналасына да жарық нұрын шашатын, көпке пайда келтіретін қоғам игілігі. Білім – қараңғыда шамшырақ болатын жарық сәуле. Бүгінгі жастардың білім жарығына ұмтылуы, ғылым игеруі еліміздің де жарқын болашағына үлес болатын маңызды қажеттілік.
Білімнің маңызы асыл дініміз исламда да аса жоғары бағаланады. Оған Құран Кәрімнің ең алғашқы аятының: «Оқы! Жаратқан Раббыңның атымен оқы!» («Алақ» сүресі,1-аят), - деп адамзатты оқуға, білімге бұйыруы айғақ. Ғалымдар бұл аяттың мағыналық негізінің маңыздылығын күллі мұсылман баласы үшін пайдалы болған барлық ілім саласын қамтуымен байланыстырады.
Алла Тағала Құран Кәрімде білімнің артықшылығын бізге былай баяндайды: «Білетіндер мен білмейтіндер тең бе? Шын мәнінде ақыл иелері ғана ғибрат ала алады!», - деген. («Зумар» сүресі, 9-аят). Ал күллі ғұмыры барша адамзатқа үлгі болған ардақты Пайғамбарымыз Мұхаммед (оған Алланың салауаты мен сәлемі болсын) білім турасында: «Білімге ұмтылу – әрбір мұсылман ер мен мұсылман әйелдің міндеті», - деген. Бұл хадисті имам әт-Табарани мен имам Байхаки жеткізген. Қажетті білім алып, соған ұмтылу – әрбір иманды адамның міндеті. Алланың Елшісі Мұхаммед (оған Алланың салауаты мен сәлемі болсын): «Егер Алла біреуге ерекше игілік бергісі келсе, оған дін түсінігін (білімін) береді», - деген. Имам Бұхари аталмыш хадистің сахих хадис екендігін келтіреді. Бұл хадистен білім, ғылым ізденушілердің Алла Тағаланың бұл дүниеде ерекше нығметтер берген адамдар екендігін және ондай адамдар о дүниеде Алла Тағаланың мейіріміне бөленетіндігін аңғаруға болады.
«Оқу – білім бұлағы, Білім – өмір шырағы», - деп дәл тауып айтылған қазақ мақалынан өмірдің шырағына айналатын білімнің оқу арқылы келетінін, ал оқу, хакім Абай айтқандай, «инемен құдық қазғандай» оңай емес екенін аңғарамыз. Оқу, білім, ғылым бәрі де тұнық сана мен таза ойға ғана қонатынын ескерсек, білім-ғылым тоқитын ең ыңғайлы кезең - жастық шақ. Жастық шақта жинаған білім өмірдің соңына дейін пайдаға асады.
Адамзат баласына берілетін нығметтің бірі - уақыт болса, осы жастық кезеңді құрайтын уақыттың әрбір сәтін, әрбір минутын пайдалы білім жинақтаумен өткізу баршамызға бұйырылған міндет. Қазақтың ұлы ақыны Абайдың:
«Жасымда ғылым бар деп ескермедім,
Пайдасын көре тұра тексермедім.
Ержеткен соң түспеді уысыма,
Қолымды мезгілінен кеш сермедім.», -
деген өлең жолдары жас кезде білім-ғылымды ескерусіз қалдыру, елемеу болашақта өкінішке алып келетінін түйсіндіреді. Жас адам жастықпен білімнің маңызын, ғылымның пайдасын түсіне бермеуі мүмкін, ал ер жеткен соң білімге ұмтылу жас адамның санасына тигізетіндей жоғары әсерін бермеуі мүмкін. Сол үшін де жастық кезеңді мағыналы істермен өткізу, әлбетте, екі дүниемізге де пайдалы білім жинақтауға арнау абзал іс болмақ.
Сөзімді түйіндер болсам, білім – екі дүниемізге де азық болатын үлкен нығмет. Білім нәрімен сусындаған көзі ашық, көкірегі ояу, саналы ұрпақтардан болу – Ислами қоғамда да, жалпы қоғамда да үлкен әлеуетке ие маңызды міндет. Олай болса, жастық шақты пайдасыз істерге жұмсамай, мәнді де мағыналы өткізуге ұмтылайық.
«Орбита-3» мешітінің наиб имамы
Тұрғараев Алмас Рахымбердіұлы
 Предыдущий |
Следующий |
| ҚАРЫЗ АЛЫП ҚҰРБАН ШАЛУҒА БОЛА МА? | ҚАЖЫЛЫҚ – БЕС ПАРЫЗДЫҢ БІРІ |
Тақырып аясындағы мақалалар
Қызықты тақырыптар
Намаз уақыттары 
