АЛЛАНЫҢ ЖАРАТЫЛЫСЫНА МЕЙІРІМДІЛІК КӨРСЕТУ
Раббымыз Құран Кәрімде жиі-жиі өзінің кешірімшіл, мейірімділігіне қатысты көптеген сипаттарын атап көрсеткен. Тіпті Рақымдылардың ең рақымдысы екендігін, рақымдылығының барша нәрсені қамтитындығын айтады. Әлемдегі барлық рақымдылық Алла Тағаланың шексіз мейірімділігінен бастау алады.
Алла Елшісі (оған Алланың салауаты мен сәлемі болсын): «Алла Тағала мейірімділігін жүзге бөлді. Оның тоқсан тоғызын өзінің құзырында алып қалды. Ал қалған бір бөлікті жер жүзіне жіберді. Міне осы бір пайыз мейірімділік арқасында барша махлұқат бір-біріне мейірімділік танытады. Тіпті биенің құлынына зиянын тигізбеу үшін аяғын көтеруі, осы бір рақымдылықтың әсері», - дейді асыл Пайғамбарымыз "оған Алланың салауаты мен сәлемі болсын).
Мейірімділігі шексіз Раббымыз, құлдарының бір-біріне рақымдылық пен мейірімділік танытуларын мұрат етеді. Әлемнің мақтанышы Пайғамбарымыз (оған Алланың салауаты мен сәлемі болсын) мейірімді жан болатын. Бұл оның басты сипаттарының бірі еді. Алла Тағала оны жер жүзіне «рақымдылықты таныту» үшін жіберді. Алла Тағала өзінің көркем есімдері болып табылатын «раууф» (аса рақымды) және «рахим» (ерекше мейірімді) сипаттарын Пайғамбарымызға (оған Алланың салауаты мен сәлемі болсын) нәсіп етті.
Барлық жаратылысқа мейірімділік таныту, жылы шырай көрсету иманның кемелдігіне ишарат етеді. Кәміл мүмін қараңғы түндегі толған ай секілді нұрын шашады. Халықшыл, көпшіл болады. Оның басты ұстанымдарының бірі жомарттық, сақилық. Сонымен қатар бойынан сезімталдық, сыпайылық, биязылық байқалады. Рақымдылық пен мейірімділік оның ажырамас серігіне айналады. Мейірімділік пен рақымдылық атаулыдан жұрдай жандар, кеудесінен жаны шыққан өлік секілді жылу алмайды.
Хадис-шәріптерде былай деп айтылады: «Рақымдылық танытқанға Алла Тағала рақымдылық көрсетеді. Жер жүзіндегілерге рақымдылық танытсаңдар, көк жүзіндегілер де сендерге рақымдылық танытады»(Тирмизи). «Мейірімділік танытпағанға, мейірімділік көрсетілмейді» (Бұхари, Әдеп). «Мейірімділік тек бақытсыздың жүрегінен алынады» (Тирмизи, Бирр).
Жаратушының назарымен, жаратылысқа рақымдылықпен назар салу Алла Елшісінің (оған Алланың салауаты мен сәлемі болсын) төмендегі мына хадисінде айтылған.
Бір күні Алла Елшісі (оған Алланың салауаты мен сәлемі болсын) сахабаларына қарап: «Жанымды қолында ұстап тұрған Аллаға ант етейін, бір-біріңе мейірімділік танытпасаңдар жәннатқа кіре алмайсыңдар» деді. Сахабалар: «Уа, Алланың Елшісі! Баршамыз мейірімді жанбыз», – десті. Пайғамбарымыз (оған Алланың салауаты мен сәлемі болсын): «Менің айтып тұрғаным, сендердің түсінгендерің секілді бір-біріңе деген мейірімділік емес. Керісінше күллі махлұқатты қамтитын мейірімділік. Иә, «күллі махлұқатты қамтитын мейірімділік» деп сөзіне түсініктеме берді.
Мүминдердің иман сезімін толқытатын, нәпсі өзімшілдігінен құтқаратын, рухани деңгей тұрғысынан кемелдендіретін ең басты қасиеттердің бірі мейірімділік болып табылады. Мейірімділіктің жемісі жомарттық, қарапайымдылық, еңбектену және күңшілдіктен құтылу. Алла Елшісі (оған Алланың салауаты мен сәлемі болсын) былай дейді: «Мүминдер бір-біріне деген сүйіспеншілікте, бір-біріне деген жанашырлықта және бір-бірін қорғауда бір денеге ұқсайды. Дененің кез келген ағзасы ауырғанда, өзге ағзалар да ұйқысыздыққа тап болады. Мазасы қашып, қызуы көтеріледі» (Бұхари )
Мейірімділік, бұл дүниеде ар-ождан тыныштығы. Жәннаттың сүйіншісі. Ал ақыретте бақытты болудың кепілі. Бір кісі Мұғаз ибн Жәбалға келіп: «Маған насихат айтшы», – деген екен. Сонда Мұғаз: «Мейірімді бол! Пейішке кіруіңе мен кепіл болайын», – деп жауап беріпті.
Медеу ауданы Әл-Хамит мешітінің бас имамы
Асылхан қажы Аманқұлов
 Предыдущий |
Следующий |
| ШҮКІРДІҢ БАСЫ - АЛЛАҒА МАДАҚ АЙТУ | САУЛЫҒЫҢДЫ ОЙЛАСАҢ, САПАРҒА ШЫҚ! |
Тақырып аясындағы мақалалар
Қызықты тақырыптар
Намаз уақыттары 
