ӘЖЕЛЕР ЖАМАҒАТЫ РУХАНИ-ТАНЫМДЫҚ САЯХАТҚА ШЫҚТЫ
ҚМДБ «Әйел-қыздар» секторы Алматы қаласы бойынша өкілдігі «Дархан дала» жобасы аясында Өзбекстанға рухани-танымдық саяхат ұйымдастырды.
«Әйел-қыздар» секторының Алматы қаласы бойынша жауапты маманы Гүлмира Ілесбайқызы Орталық мешіт жамағатындағы әжелер тобын Өзбекстан Республикасына рухани-танымдық саяхатқа бастап барды. Сапардың негізгі мақсаты – ислам өркениетінің бай мұрасымен танысу, ұлы ғұламалардың өмірі мен ғылыми еңбектерін зерделеу, тарихи-мәдени ескерткіштерді аралау арқылы рухани білімді тереңдету және жамағат арасындағы бауырмалдық байланысты нығайту.
Саяхат барысында алғашқы аялдама Өзбекстан астанасы Ташкент қаласындағы Ислам өркениеті орталығында болды.
Ислам өркениеті орталығы – ғылым мен руханияттың тоғысқан ордасы
Қатысушылар орталықтың көрме залдарын аралап, мұсылман өркениетінің дамуына өлшеусіз үлес қосқан әл-Хорезми, әл-Фараби, әл-Бируни, Ибн Сина, Имам Бұхари, Әбу Мансұр әл-Матуриди, Мирзо Ұлықбек сынды ұлы ғалымдардың өмірі мен ғылыми мұраларымен танысты. Орталықтың ең ерекше орындарының бірі – қасиетті Құран залы. Мұнда мұсылман әлемі үшін аса құнды тарихи жәдігер – хазіреті Османның (р.а.) Мусхафы сақталған. Бұл көрме қатысушыларға ерекше әсер қалдырды.
Бұдан кейін саяхат Самарқанд қаласында жалғасты.
Самарқанд – ұлы ғұламалар мен өркениет ізі қалған мекен
Сапар барысында әлемге әйгілі хадис ғалымы Имам Бұхаридің кесенесіне зиярат етті. «Сахих әл-Бұхари» атты хадистер жинағының авторы болған ұлы ғалымның мұрасы Ислам әлемінде айрықша орын алады. Қатысушылар ғұламаның өмір жолы мен хадис ғылымына сіңірген еңбегі туралы мәліметтерге қанығып, рухани тағылым алды.
Сонымен қатар ислам ақидасының қалыптасуы мен дамуына зор үлес қосқан Әбу Мансұр әл-Матуридидің кесенесіне барып, ғалымның ғылыми мұрасы мен Ислам іліміндегі орнына қатысты мағлұматтар алды. Сапар аясында Әмір Темір әулетінің тарихымен байланысты Гүр-Әмір кесенесі, Самарқандтың сәулет өнеріндегі жауһары саналатын Регистан алаңы да араланды. Ғасырлар бойы сақталған тарихи ғимараттар мен шығыс сәулет өнерінің қайталанбас үлгілері саяхатшылардың ерекше қызығушылығын тудырды.
Сондай-ақ Өзбекстан Республикасының тұңғыш президенті Ислам Каримовтың мемориалдық кешеніне барып, ел тарихындағы маңызды кезеңдермен танысты. Бұдан бөлек, Самарқанд қаласындағы Даниял пайғамбардың кесенесі мен Қыдыр атаға қатысты қасиетті орындарға да зиярат жасалды. Бұл орындарда қатысушыларға олардың тарихы мен халық жадындағы рухани мәні туралы мәліметтер берілді.
Рухани сапар – жүрекке тағылым, көңілге қуаныш
Аталған саяхат жамағат апалары үшін тарихи орындарды аралаумен ғана шектелмей, рухани білімдерін толықтырып, өткен тарихтан өнеге алуға мүмкіндік берген тағылымды сапар болды.
Осындай рухани-танымдық шараларды ұйымдастыру – әйел жамағатының діни сауатын арттыруға, ұлттық және рухани құндылықтарды дәріптеуге, үлкен буын өкілдерінің бос уақытын мазмұнды өткізуіне бағытталған игі бастамалардың бірі.
Новости по теме
Интересные материалы
Время намаза 
