«МҮЗӘММИЛ» МЕШІТІНДЕ АҚСАҚАЛДАР БАС ҚОСТЫ
«Мүзаммил» мешітінде «Той – тәрбие мен тағылымның ордасы» атты Әуезов ауданы ақсақалдарының жиыны өтті.
Тағылымды басқосуға аудан имамдарымен бірге Алматы қаласы Орталық мешітінің наиб имамы Назар Сұлтанбай қатысты. Жиынды Әуезов ауданының бас имамы Серікхан қажы Рымханұлы ашып, той-томалақтағы ұлттық тәрбие мен рухани құндылықтардың маңызына тоқталды. Орталық мешіт наиб имамы Назар Сұлтанбай той-думанның тек көңіл көтеру емес, тәрбиелік мәні бар тағылымды орта болуы керектігін атап өтті. Құран аяттары мен хадистер негізінде ізгілікке үндеп, ұрпаққа өнеге көрсетудің маңызын жеткізді.
Таугүл мешітінің бас имамы Р.Қамбар той жасау, аруаққа арнап ас беру сияқты жиындарда ата-баба дәстүрін, ұлттық құндылықтарды негізге алу өзекті екенін айтып пікір білдірді. Осы орайда, салт-дәстүрдің мән-мағынасын түсініп дұрыс ұстауда елге жөн көрсетіп, ақыл айтуда ақсақалдардың шешу роль атқаратындығын тілге тиек етті. Аудан мешіттерінің ақсақалдары да аталған тақырып төңірегінде, ас пен тойда ысырапшылдыққа жол бермеу жөнінде ой-пікірімен бөлісіп, талқылады.
Жиын соңында «Музаммил» мешітінің бас имамы ақсақалдарға алғысын білдіріп, ел ағаларының батасымен тәмамдады. Ақсақалдың батасы – ұрпаққа өнеге, өнегелі той – қоғамға тәрбие.
Тақырып бойынша жаңалықтар
Қызықты тақырыптар
Намаз уақыттары 
