ЕЛОРДАДА ӨТІП ЖАТҚАН ФОРУМДА «АДАЛ ҚОҒАМ» ТҰЖЫРЫМДАМАСЫ ҚАБЫЛДАНДЫ
Бүгін Елордадағы «Нұр-Сұлтан» мешітінде «Ислам және адал қоғам» жылы аясында «Адал қоғам: білім, рухани тәрбие және жауапкершілік» атты дін қызметкерлеріне арналған республикалық форумы өтуде.
Шараға ҚМДБ Төрағасы, Бас мүфти Наурызбай қажы Тағанұлы, Мәдениет және ақпарат вице-министрі Рустам Әлиұлы, Ардагерлер кеңесінің төрағасы Әбілғазы Құсайынов, мемлекет және қоғам қайраткерлері, зиялы қауым өкілдері, ҚМДБ Ақсақалдар, Сарапшылар, Жастар кеңесінің мүшелері, Мүфтият қызметкерлері, облыс Бас имамдары мен медресе-колледж, құран жаттау орталықтарының директорлары қатысуда.
Сондай-ақ, қашықтықтан 19 өкілдіктен имамдар, әйел-қыздар секторының облыстардағы жауапты жетекшілері, 9 медресе-колледж ұстаздары мен шәкірттері жалпы 660 адам қосылды.
Форум пленарлық отырыстан басталып, алдымен вице-министр Рустам Әлиұлы Мәдениет және ақпарат министрі Арман Оразбайұлының сәлемін жеткізіп, құттықтауын оқыды.
Елордада өтіп жатқан «Адал қоғам: білім, рухани тәрбие және жауапкершілік» атты дін қызметкерлеріне арналған республикалық форумында «Адал қоғам» тұжырымдамасы таныстырылып, қабылданды.
Тұжырымдаманы көпшілікке ҚМДБ Уағыз-насихат бөлімінің меңгерушісі Батыржан Мансұров таныстырды. Маңызды құжаттың дайындалудағы мақсаты ислам дінінің құндылықтарына негізделе отырып, қоғамда адал, әділетті, жауапты әрі рухани тұрғыда жетілген орта қалыптастыру. Ал негізгі міндеті адалдық ұғымын тереңірек түсіндіріп, ел ішінде әділдік пен жауапкершілікті арттыру.
Тұжырымдама негізгі бес бөлімнен тұрады:
Адал қоғам ұғымының исламдағы негізі;
Адал қоғамның негізгі қағидаттары;
Адал қоғам қалыптастыру жолдары;
Жастар және адал қоғам;
Күтілетін нәтижелер.
Таныстырылымнан соң Ардагерлер кеңесінің төрағасы Әбілғазы Құсайынов пен Мемлекет және қоғам қайраткері, ҚМДБ жанындағы Ақсақалдар кеңесінің мүшесі Жабал Ерғалиев аталған тұжырымдамаға қатысты пікір білдірді.










