ҚАСИЕТТІ АШУРА КҮНІ
Мұхаррам айында келетін Ашура күні - мұсылман тарихында айтулы күндердің бірі. Бұл айда мұсылмандар Меккеден Мәдина қаласына қоныс аударған.
Енді «Ашура» сөзінің мағынасына келер болсақ. Мұхаррам айының оныншы күніне келгендіктен Ашура яғни «оныншы» күн атау берілген. Бұл күнді надандық дәуірінде де қасиет тұтқан. Ислам діні келмей тұрып арабтар осы күні ораза ұстайтын болған. Айша анамыз (р.а.) бір сөзінде: «Рамазан парыз болмай тұрып, олар Ашура күні ораза ұстайтын, әрі сол күні Қағбаның жабуын ауыстыратын». Пайғамбарымыз (оған Алланың салауаты мен сәлемі болсын) Мәдина қаласына хижрет еткеннен кейін, қала тұрғындары Яһуди дінін ұстанатындардың да Ашура күні ораза ұстайтынын көреді. Мұнын себебін сұрағанда: «Бұл күні Мұса пайғамбар және Исраил қауымы Перғауынның құлдығынан құтылып, Аллаға шүкір етіп Мұса пайғамбар ораза ұстаған» деген жауап алады. Сонда Алланың Елшісі (оған Алланың салауаты мен сәлемі болсын): «Біз Мұса пайғамбарға сендерден де жақынрақпыз» деп сол күні ораза ұстауды мұсылмандарға кеңес береді. Әбу Муса Ашғари былай дейді: «Ашураны Яһуди қасиет тұтып, бұл күнді мейрам санайтын. Пайғамбарымыз болса бізге: «Сендер ауыздарыңды бекітіңдер!» деді.
Ашура күні ниет етіп ораза ұстап, жіберген қателіктеріміз үшін Алладан кешірім тілейтін ерекше күн. Әзіреті Әли (р.а.) жеткен бір хадисте, бір кісі Пайғамбарымыздан (оған Алланың салауаты мен сәлемі болсын): «Уа Алланың елшісі! Рамазан айынан кейін, қай айда ораза ұстауыма кеңес етесіз» деп сұрағанда, Ол: (оған Алланың салауаты мен сәлемі болсын) Мұхаррам айында ораза ұста. Шынында бұл ай Алланың айы. Бұл айда бір күн бар, сол күні Алла Тағала кей қауымның тәубесін қабыл еткен. Қалғандардың да тәубесін қабыл етеді. Ол күні ниеттеніп ораза ұстаған жанның күнәләрі кешіріледі», - дейді. Пайғамбарымыздан (оған Алланың салауаты мен сәлемі болсын) Ашура күнгі ораза жайында сұрағанда, Ол (оған Алланың салауаты мен сәлемі болсын): «Өткен жылдағы жасаған (кіші) күнәләрі кешіріледі» деген. Осы күні қанша күн ораза ұстау керектігіне келер болсақ, Пайғамбарымыздан (оған Алланың салауаты мен сәлемі болсын) «Ашура күні ораза ұстаңдар. Яһудилерге ұқсамау үшін алдында бір күн және кейін тағы бір күн, тұтыңдар» деген. Басқа бір риуаятта Алла елшісі (оған Алланың салауаты мен сәлемі болсын): «Егер келесі Ашура күніне дейін аман болсам, Ашура күнінен өзге оның алдында бір күн, яғни Мұхаррамның тоғызыншы күні де ораза ұстаймын», - деп Ашура күніне бір күн ораза ұстаудың ұнамды іс екенін айтып кеткен. Сонымен қатар ол күні отбасына сыйлық жасап, тәттілер әперген де құп амал. Пайғамбарымыз (оған Алланың салауаты мен сәлемі болсын): «Кімде кім ашура күні әйел-бала шағасына кеңшілік жасаса, Алла оған жыл бойы кеңшілік жасайды» деген. Осыған орай Ханафи мәзһабында Ашура оразасын ұстау – сүннет, оған алдыңғы (тоғызыншы), не кейінгі (он бірінші) күнді қосып тұту – мұстахап деп пәтуа берілген.
Алла Тағала мұхаррам айында,ашура күніндегі ұстаған оразамызды, жасаған құлшылық, дұғаларымызды қабыл еткей.
"Бәйкен" мешітінің азаншысы
Жұмалиев Сұлтан
 Предыдущий |
Следующий |
| АШУРА КҮНІНДЕГІ АМАЛ | ШЫНШЫЛДЫҚ ЖАҚСЫЛЫҚҚА, ЖАҚСЫЛЫҚ ЖӘННАТҚА ЖЕТЕЛЕЙДІ |
Қызықты тақырыптар
Намаз уақыттары 
