ОТАНДЫ СҮЮ -ИМАННАН
Адам баласының табиғатындағы ең терең сезімдердің бірі – туған жерге деген махаббат. Отанға деген сүйіспеншілік – адам жүрегінде иманмен бірге орнығатын асыл қасиет. Исламда бұл сезім рухани құндылық ретінде қаралып, мұсылманның міндеттерімен тікелей байланысады. Пайғамбарымыз (оған Алланың салауаты мен сәлемі болсын) Мединеге келгенде «Уа, Алла! Бізге Мединені Меккені сүйгендей, не одан да қатты сүйдір!» – деп дұға етуі туған жерге деген махаббаттың имани сипатын көрсетеді.
Отанға сүйіспеншілік – табиғи әрі имани сезім сондықтан да әр адам өз жерін қадірлейді. Бұл – жаратылыстың заңдылығы. Бірақ Ислам бұл сезімді тек табиғи деңгейде емес, жауапкершілік пен аманат деңгейіне көтереді.
Алла Тағала Құранда: «Мен жер бетіне орынбасар жаратамын» – Бақара, 30-аят. Бұл аят адамның туған жеріне, тұрған ортасына жауапкершілікпен қарау міндетінің бар екенін айғақтайды. Отан – адамның Алла алдындағы аманаты. Ал отанға қызмет ету – иманның жемісі. Иман тек жүректегі сеніммен шектелмейді, ол амалдармен көрініс табады. Ел қорғау, қоғамға қызмет ету, бейбітшілік пен тәртіпті сақтау – иманның іс жүзіндегі көріністері.
Пайғамбарымыз (оған Алланың салауаты мен сәлемі болсын) былай дейді: «Адамдардың ең қайырлысы – елге көбірек пайдасы тигені» Отанға пайда келтіру – елдің игілігіне жұмыс істеу. Бұл – мұсылмандық руханияттың ең биік деңгейі.
Ұлтты сүю – бөлінушілік емес, жауапкершілік. Ислам барлық адамдарды бауыр деп танығанымен, адам өз Отаны мен халқы үшін жауапты. Ұлтты сүю басқа халықтарды кемсіту емес, керісінше, әркім өз елінің дамуына үлес қосатын әділетті тәртіптің көрінісі. Қазақ: «Отанды сүю – отбасынан басталады» дейді. Бұл – Исламдағы тәрбиелік қағидалармен үндес келеді. Елге адалдық, тәртіпке бағыну, тіл мен салтты сақтау – Отанға деген махаббаттың іс жүзіндегі көрінісі.
Пайғамбардың (оған Алланың салауаты мен сәлемі болсын) туған жерге деген махаббаты өте ерекше болған. Пайғамбарымыз (оған Алланың салауаты мен сәлемі болсын) Меккеден Мәдинаға һижрет еткенде туған жеріне деген сағынышын жасырмай былай деген: «Уа, Мекке! Аллаға ант! Сен – мен үшін ең сүйікті мекен…».
Бұл хадис Отанды сүю – мұсылман үшін табиғи ғана емес, сүннет екенін дәлелдейді. Елге деген махаббат – жүректегі иманның қуаты. Елді қорғау – қасиетті міндет болғандықтан. Исламда ел қауіпсіздігін сақтауға үлкен мән берілген. Бір хадисте: «Мұсылман елін қауіптен қорғау – жихад» делінеді. Отанды қорғау – тек қарумен күзету емес. Ел бірлігі, отбасындағы тәрбие, қоғамдағы әділдік, білім мен еңбек – бәрі Отанды қорғаудың ажырамас бөлігі.
Отанды сүю – иманнан. Мұсылман баласы туған жеріне адал, еліне пайдалы, қоғамға жауапты болуы тиіс. Отан – Алланың аманаты. Бұл аманатқа адалдық – ең үлкен парыз. Қазақстан – ата-баба аманаты. Осы кең даланы қорғап, оны көркейту – біздің ұрпақтық міндетіміз. Отанды сүю – жүректе басталып, амалмен дәлелденетін қасиетті мұсылмандық мінез.
«Қарасай батыр» мешітінің
наиб имамы Қаленов Кенжебек
 Предыдущий |
Следующий |
| Шарапаты мол шағбан айы | ТӘУЕЛСІЗДІК – ТҰТАСТЫҚ ПЕН ТҰРАҚТЫЛЫҚТЫҢ АЛТЫН АРҚАУЫ |
Тақырып аясындағы мақалалар
Қызықты тақырыптар
Намаз уақыттары 
