БАРААТ ТҮНІНІҢ БЕРЕКЕСІ

Аса қамқор, Ерекше мейірімді Алланың атымен бастаймын. Аллаға сансыз шүкір, уақыт өткен сайын халқымыздың ислам діні туралы сауаттылығы артып, ненің дұрыс, ненің бұрыс екендігін білгісі келетін көзқарастары артып, дінімізді насихаттау бағыты кеңінен етек алған. Әрине, Ислам дінінің тарам-тарам тармақтары, халық үшін білуі тиіс қарапайым қағидалары, мұсылманға қажетті ережелері де бар. Мұны айтуымыздың себебі неде?

Мұсылман халқымыз діндегі қасиетті күндерге аса мән берген. Әсіресе, жұма күнінің қасиетін жақсы түсініп, жұма намазынан қалмай құлшылығын жасауға тырысады. Сол секілді қасиетті Рамазан айындағы Қадір түні де мұсылмандар арасында зор ықыласпен аталып өтіледі. Аллаға жалбарынып, қасиетті айдағы қасиетті күнді жіберіп алмай дұғаларын жасайды. Осы секілді, дінімізде басқа да қасиетті түндер бар екенін халқымыз, мұсылман бауырларымыз білуі тиіс.

Асыл дініміз исламда қасиетті саналатын үш ай бар. Олар Ережеп, Шағбан, Рамазан. Бұл үш ай басқа айларға қарағанда жоғары тұрады, құлшылықты арттыруға себеп болады. Ережеп айында Рағайып түні, Шағбан айында Бараат түні, Рамазан айында Қадір түні бар.

Осы қасиетті үш ай келіп жеткенде «Алла Тағалам, Ережеп пен Шағбан айларын берекелі ете гөр. Бізді Рамазанға аман-есен жеткіз» деп дұға жасаған жөн.

Біздің мақаламызға арқау болар қасиетті түн – Бараат түні. Шағбан айында қасиетті Бараат кеші бар. Яғни қасиетті шағбан айының 15-і - Бараат түні. Бұл түн – періштелер жер бетіне түсетін, дұғалар қабыл болатын, кері қайтарылмайтын берекелі түн.

Сол себепті бұл түнде Пайғамбарымызға (оған Алланың игілігі мен сәлемі болсын) көп салауат айтып, Алладан біліп-білмей істеген күналарымыздың кешірілуін тілеп дұға жасап құлшылықпен өткізген абзал. 

Пайғамбарымыз (оған Алланың салауаты мен сәлемі болсын): «Бұл түні көктердің есіктері ашылады, періштелер мұсылмандарға сүйінші айтады, ғибадатқа шақырады. Бараат түнінде көп ғибадат жасаңдар! Әйтпесе, Қияметте өкінесіңдер», – деген. Қарыздардан, күнәларынан, жазадан құтылу деген мағынаны білдіретін Бәраат – тазару кеші. Бұл түн – Алланың өзінен кешірім сұраған пенделерін кешіріп, күнәдан арылу түні. Бұл түні барынша құлшылық етіп, Алла Тағаладан кешірім сұрауымызды қалаған Алла Елшісі (оған Алланың игілігі мен сәлемі болсын) былай деген: «Шағбан айының он бесінші түні болғанда тек қана ғибадатпен өткізіңдер, ал күндіз ораза ұстаңдар. Өйткені, Алла Тағала сол түні күн шыққанға дейін әлемге мейірімін төге тұрып, былай дейді:

– Кешіруімді қалайтын адам бар ма, кешейін?

– Рызық талап етушілер бар ма, берейін?

– Дертке шалдыққандар бар ма, шипа берейін?

– Тағы кім не тілесе тілесін, берейін!»

Ендеше, Раббымыздың сүйінші хабарына құлақ асып, берілген мүмкіндіктерден пайдаланып, Алладан кешірім сұрап, қол жайып көп дұға жасағанымыз жөн.

Бәраат түнін дұрыс қарсы алу үшін, бұл түнді ұйқысыз және құлшылықпен өткізген абзал. Алайда кімнің бұған шамасы жетпесе, ол адам осы түннің кез келген бөлігін құлшылыққа арнай алады. Осы орайда халық тарапынан қандай құлшылықтарды жасасақ екен деген сауалдар болып жатады. Олардың қатарына нәпіл намаздар оқу, көптеп зікір айту, дұға жасау, қасиетті Құранды оқу, салауат айту, Алладан кешірім тілеу, шағбан айының 15-ші күні ораза ұстауды атасақ болады. Бұл қасиетті түн – кешірім түні деп те аталғандықтан Алладан кешірім сұрап, истиғфар айтуды көбейткеніміз абзал.

Шындығында пенделердің өзіне берілген уақытты тиімді пайдалана бермейтіні анық. Денсаулық пен уақыттың қадірін білу керек екендігі туралы естіп, біліп жүрміз. Алайда амалымыз қаншалықты соған сай? Осындай қасиетті кешті пайдаланып, алтын уақытымызды құлшылыққа арнауға ерінбеуіміз керек. Қашанда Алланы зікір етіп, дұға жасауға кеткен уақыт өзің үшін хайырлы болмақ.

«Егер кімде-кім менің насихатыма теріс қараса, онда оның өмірі тарлыққа түседі, қияметте Біз оларды көрсоқыр қалпында жинаймыз. Сонда ол: «Ей, Раббым! Мені не үшін қабірден соқыр етіп тұрғыздың? Менің (дүниеде) көзім болып еді ғой?» - дейді. «Саған Біздің айқын аяттарымыз келді, сен оларды ескерген де жоқсың. Ал, бүгін сен де еске алынбайсың», – дейді Алла».

Пайғамбарымыздың (оған Алланың игілігі мен сәлемі болсын) осы қасиетті түнді қалай өткізгені жөнінде мысал келтірсек. Мұсылмандардың анасы болған Айша анамыз (оған Алла разы болсын) былай дейді: «Бірде Алланың Елшісі (оған Алланың игілігі мен сәлемі болсын) түнгі намазында сәждеде ұзақ уақыт жатып қалды. Сәждеде ұзақ болғаны соншалық, мен тіпті қайтыс болып кетті ме деп қорықтым. Осы оймен төсегімнен тұрдым да бас бармағын қозғап көрдім. Саусағы қимылдаған соң өз орныма қайта келдім. Осыдан соң мен оның сәждеде жатып, былай дегенін естідім: «Я Раббым, Сенің азабыңнан, мейіріміңе жүгініп, үміт етемін. Мен Сенен пана тілеймін. Сені Өзің лайық болған дәрежеде мадақтай алмаймын. Сен Өзіңді сипаттағандайсың».  Осыдан соң ол маңдайын сәждеден көтеріп, намазын аяқтады. Және маған былай деді: «Ей Айша, Пайғамбар сені қалдырып кетті деп ойлап қалдың ба?» Мен оған: «Жоқ, Алланың Елшісі, мен тек қана сенің жаныңды осы өмірден алып кетті ме деп қорықтым, өйткені сенің сәждең өте ұзаққа созылды ғой».  Осыдан соң Ол: «Бұл түннің қандай түн екенін білесің бе?», -  деп сұрады. Мен: «Алла мен Оның Пайғамбары жақсы біледі» - деп жауап бердім. «Бұл Шағбан айының жартысы толған түн.  Бұл түнде Алла Тағала құлдарына мейірімін жаудырып, кешірім тілегенді кешіріп, мейірім тілегендерге мейірімін жаудыратын түн. Тек қана жүрегінде мұсылман бауырына деген кегі бар адамға ол райынан қайтпағанша назар аудармайды», - деп жауап берген.

Осы жоғарыда айтылған маңызды мәліметтерден-ақ қасиетті Бараат түнінің қандай берекелі, мұсылмандар үшін пайдалы, ақыретіне сауап жинайтын түн екендігін ұғамыз. Олай болса, Алла қаласа биылғы жылдың күнтізбесі бойынша 24 ақпаннан 25 ақпанға қараған түнге сәйкес келіп тұрған қасиетті Бараат түні құлшылығымызды арттырайық. Алла тағала күнәларымызды кешіріп, дұғаларымызды қабыл еткей.

Аманқұлов Жеңісхан

«Ақсай» мешітінің қызметкері