«ҚҰРБАН АЙТ - 2026»: 12 МЕШІТТЕ ҚҰРБАНДЫҚ ШАЛУҒА РҰҚСАТ ЕТІЛДІ
Алматы қаласы Өңірлік Коммуникациялар қызметінде өткен Құрбан айтқа қатысты брифингте қала бойынша 12 мешітте құрбандық шалуға рұқсат берілгенін айтты.
Төлеби Дәділұлы алматылықтарға ҚМДБ Төрағасы Наурызбай қажы Тағанұлының Құрбан айт мерекесіне орай ыстық сәлемін жеткізді. Елордада өткен баспасөз мәслихатында Бас мүфти Наурызбай қажы Тағанұлы құрбан айт күндері 27-28-29 мамыр күндеріне тура келетінін айтқан болатын. Бүгінгі брифингте бас имам Төлеби Дәділұлы Алматы қаласы бойынша 27-мамыр күні 56 мешітте таңғы сағат 6:00-де айт намазы оқылатынын жеткізді.
ҚМДБ Зекет және қайырымдылық қорының Алматы қаласы бойынша жауапты маманы Бауыржан Көптілеуов құрбандыққа шалынатын малдарды сату, сою және таратуға рұқсат етілген арнайы 12 орын бекітілгенін айтты. Атап айтқанда,
- Алатау ауданы бойынша: «Мырзахмет» мешіті, «Алғабас» мешіті, «Әл-Әзим» мешіті, «Нұр» мешіті.
- Бостандық ауданы бойынша: «Бақыткелді» мешіті.
- Медеу ауданы бойынша: «Омар ибн әл-Хаттаб» мешіті, «Аманқұл ата» мешіті, «Фатима» мешіті, «Райымбек батыр» мешіті, «Арафат» мешіті.
- Наурызбай ауданы бойынша: «Қалқаман-2» мешіті.
- Түрксіб ауданы бойынша: «Қайрат» мешіті. Сонымен қатар тұрғындарға қолайлы болу үшін құрбан етін қабылдау пункттері қаланың 56 мешітінде де бар. Арнайы мұздатқыштар орнатылып, тасымалдау көлік құралдарымен қамтамасыз етілмек. Қала тұрғындары өз үйіне жақын мешіттерге барып, құрбандық еттерін өткізе алады.
Онлайн түрде тапсырыс берушілер үшін жылдағыдай QURBAN.MUFTYAT.KZ сайты қайта іске қосылғанын жеткізді. Құрбандық етін алуға өтініштер де осы QURBAN.MUFTYAT.KZ сайты арқылы қабылданады.
Спикерлер Құрбан шалу рәсімін арнайы белгіленген орындарда атқаруға шақырды. Аулаларда, мекеме маңында, базарларда және басқа да қоғамдық орындарда құрбан шалу рәсімін өткізуге болмайтынын айтты. Ондай орындарда құрбан шалу кезінде мал қалдықтарының тез исі шығып, адамдарға қолайсыздық туғызатынын, мереке күндері тәртіп пен тазалықты сақтау қажеттілігін жеткізді.
Тақырып бойынша жаңалықтар
Қызықты тақырыптар
Намаз уақыттары 
.jpg)
