«ҚҰДАЙЫ АС – ЖАРЫС ЕМЕС, САУАП» ТАҚЫРЫБЫНДА КЕЗДЕСУ ӨТТІ
«Байкен» мешітінде «Құдайы ас – жарыс емес, сауап» атты кездесу өткізілді.
Іс-шараға мешіттің бас имамы Құлмұхаммед қажы Маханбет, ҚМДБ РАНТ мүшесі, Алматы Орталық мешітінің наиб имамы Қуаныш Тоқсанбайұлы, Бостандық ауданының ардагерлер кеңесінің төрағасы Саденов Жангельды Саденұлы, Бостандық ауданының апа-әжелер алқасы мүшелері қатысты.
«Құдайы ас жарысқа, мақтанға немесе бәсекеге айналмауы керек. Дастарқанға қарап, келген ағайын риза болмайды деген алаңмен несие алып, қарызға батып, ас беру – дұрыс емес. Көрпесіне қарай көсілгені дұрыс. Ислам діні ысырапқа жол бермейді. Құдайы ас – жарыс емес, сауап. Құдайы ас – мақтан емес, тағылым. Құдайы ас – ысырап емес, игілік» деп түйіндеді Құлмұхаммед қажы.
Алматы Орталық мешітінің наиб имамы Қуаныш қари: «Құдайы ас берудің тарихи мәнін айта келе мұсылмандықтағы орнын түсіндіріп, бұл рәсімнің негізгі мақсаты марқұмды еске алып, оған Құран бағыштау, ағайын-туыстың басын қосу және сауапты амал жасау екенін жеткізді. Сонымен қатар ас беру кезінде ысырапқа, орынсыз шығынға ұрынбай, қарапайымдылықты ұстанудың маңызына тоқталды».
Ардагерлер кеңесінің төрағасы Жангельды Саденұлы: «ҚМДБ қоғамда өзекті мәселерді көтеріп, діни және салт-дәстүр тұрғысынан оңды шешімдер қабылдап жатыр. «Ас беру мәдениеті» құжаты дер кезінде қабылданған дұрыс шешім деп ойлаймын. Осы құжатта Құдайы ас берудің ережелері жақсы түсіндірілген екен, сондықтан халық арасында жақсылап, насихаттау керек» деді.
Кездесуге жиналған қонақтармен ұсыныс-пікірлер талқыланып, кездесу шарасы қорытындыланды.
Тақырып бойынша жаңалықтар
Қызықты тақырыптар
Намаз уақыттары 
