АЛЛА БЕЙНЕЛЕРІҢЕ ЕМЕС ЖҮРЕКТЕРІҢЕ НАЗАР САЛАДЫ
Аса қамқор, Ерекше мейірімді Алла Тағалаға сансыз мадақ болсын! Адамзаттың ардақтысы, сүйікті Пайғамбарымыз Мұхаммедке Алланың салауаты мен сәлемі болсын.
Расында Алла Тағаланың жаратқан жаратылыстарының ішінде ең ұлы жаратылысы ол адам баласы. Бұл жайлы Алла Тағала Құранда: «Расында адамзатты ең көркем, ең керемет бейнеде жараттық» [1] деген. Осы аятта айтылғандай адамның сыртқы бейнесі көркем етіп жаратылған. Бірақ сыртқы бейнеден де маңызды адамның жан дүниесі, һәм жүрегі болмақ. Жүрек – имандылық мекені. Егер жүрекке иман ұяласа, адамның бойында имандылық, көркем мінез-құлық көрініс табады. Ал жүректі күпірлік мекен етсе, адамның бойында имансыздық пен жаман қасиеттер пайда болады.
Құран Кәрімде жүрек жайлы 132 жерде айтылғандығы бекер емес. Себебі иман келтірудің өзі жүрек арқылы расталып, қабыл етіледі. Бұл жайында Құранда: (Уа, Мұхаммед!) Біз саған осынау кітапты ақиқаттың нақ өзі етіп, лайықты түрде түсірдік. Ендеше, осынау хақ дінді шын жүректен толық қабылдап, бар ықыласыңмен бір Аллаға ғана құлшылық ет!» [2] - делінген.
Расында, адамның жақсы болуы оның жүрегіне байланысты. Пайғамбарымыз Мұхаммедтің (оған Алланың салауаты мен сәлемі болсын): «Денеде бір жапырақ ет бар. Егер сол түзелсе, бүкіл дене түзеледі. Ал бұзылса, бүкіл дене бұзылады. Ол бір жапырақ ет – жүрек» [3] - деген хадисінде үлкен мән жатыр.
Мұсылманның өмірінде маңызды болған қасиеттің бірден-бірі ол тақуалық. Тақуалықтың орны жүректе. Ардақты Пайғамбарымыз (оған Алланың салауаты мен сәлемі болсын) хадисінде: «Тақуалық мына жерде», [4]– деп, қолымен жүрек тұсын үш мәрте нұсқағандығы айтылады. Осы хадистен тақуалық сыртқы бейнеде емес жүректе екенін білуге болады.
Хәкім Абай атамыз он жетінші қара сөзінде: «Қайрат, ақыл, жүрек үшеуі өнерлерін айтысып, таласып келіп, ғылымға жүгініпті» деп бастап, соңында ғылымның: «Үшеуің ала болсаң, мен жүректі жақтадым. Құдайшылық сонда, қалпыңды таза сақта, Құдай Тағала қалпыңа әрдайым қарайды, кітаптың айтқаны осы», – деп айтуында үлкен мән-мағына бар.
Жүректің таза һәм сау болуы бұл дүниеде және ақырет күнінде пендені жақсылыққа жеткізеді. Бұл жайында Алла Тағала Құранда: «Ол күні мал-мүлік те, бала-шаға да пайда бермейді. Тек (күпірлік пен екі жүзділіктен) таза жүрекпен келген жан ғана (азаптан құтылып, мақсатына жетеді)» [5] - деп ескертеді.
Ендігі кезекте жүрегіміздің тыныш болуын қаласақ, онда Алланы еске алу, яғни зікір ету керекпіз. Алла Тағала Құранда: «Біліп қойыңдар! Жүректер тек Алланы зікір етумен ғана орнығып, тыныштық табады» [6] - дейді.
Қорыта айтқанда Алланың назары түсетін, адам бойында ерекше орынға ие ағза ол - жүрек. Пайғамбарымыз (оған Алланың салауаты мен сәлемі болсын) хадисінің бірінде: «Шын мәнінде Алла сендердің келбеттеріңе, байлықтарыңа қарамайды, Алла сендердің жүректеріңе, амалдарыңа қарайды» [7] - дегендей жүрегімізге және амалымызға көңіл бөлуіміз керек.
«Жүрегі таза адам қиянатқа бармайды» деп Шәкәрім Құдайберді атамыз айтқандай жүрегінде иманы бар адам қиянат жасамайды. Керісінше қиянаттан алыс болады. Бабаларымыз: «Отаны бірдің жүрегі бір, Жүрегі бірдің тілегі бір» деп бекер айтпаған. Алла біздің жүректерімізді түрлі рухани аурулардан сақтап, жүректерімізді мейірім мен махаббатқа толы етіп, ақыретке сау жүрекпен баруымызды нәсіп етсін.
-
Тин сүресі, 6-аят
-
Зүмәр сүресі, 2-аят
-
Байхақи
-
Мүслим
-
Шұғара сүресі, 88-89-аяттар
-
Рағыд сүресі, 28-аят
-
Мүслим
Бостандық ауданы
«Нұрлытау» мешітінің бас имамы
Пернебекұлы Темірбек
 Предыдущий |
Следующий |
| ДАСТАРҚАН ӘДЕБІ | ИСЛАМ ДІНІНДЕГІ РУХАНИ ҚҰНДЫЛЫҚТАР ЖӘНЕ МҰСЫЛМАН ЭТИКАСЫ |
Қызықты тақырыптар
Намаз уақыттары 
