«ҚАРТТАР - АСЫЛ ҚАЗЫНА» АТТЫ ТАҒЫЛЫМДЫ ШАРА ӨТТІ
Алматы қаласының бас имамы Төлеби Оспан Әуезов ауданындағы Шаңырақ орталығында «Қарттар – асыл қазына» атты мерекелік іс-шараға қатысты.
Ақсай мешітінің ұйымдастыруымен өткізілген іс-шарада ақ жаулықты аналар мен қарияларға ізгі тілектер айтылып, үлкендерге құрмет көрсетілді.
Қаланың бас имамы Төлеби Дәділұлы ҚМДБ Төрағасы Бас мүфти Наурызбай қажы Тағанұлының ыстық сәлемін жеткізіп, Пайғамбарымыздың (оған Алланың салауаты мен сәдемі болсын) үлкенді сыйлау, кішіге ізет көрсету жөніндегі өсиетін айтты. «Кішілерімізге мейірімділік танытпаған, үлкендерімізге құрмет көрсетпеген бізден емес», - деп ескерткен. (Имам әт-Тирмизи риуаят еткен.) Бұл хадис ұрпақтар арасындағы сыйластық пен ізеттің, мейірімділік пен адамгершіліктің маңызын айқындайды. Қарияларымызды құрметтеу – халқымыздың асыл дәстүрі әрі асыл дініміздің өнегесі», - деп атап өтті бас имам.
Шара барысында қазыналы қарияларға арнайы сыйлықтар табысталып, әсем әндер мен күмбірлеген күйлер орындалды. Мерекелік бағдарлама үлкендердің көңілін көтеріп, жүздеріне қуаныш ұялатты.
Қарияларымызға құрмет көрсету – өткенге тағзым, бүгінге өнеге, келешекке аманат. Ақ батасын беріп, ұрпаққа жол көрсеткен ардақты ақсақалдарымыз бен ақ жаулықты аналарымыздың орны әрдайым төрде болсын!
Қарияларымыз аман, ғұмырлары ұзақ, баталары қабыл болсын!
Тақырып бойынша жаңалықтар
Қызықты тақырыптар
Намаз уақыттары 
