КӨРМЕДЕ САЛТ-ДӘСТҮР ШЕРУІ ӨТТІ (ФОТО)
25 қазан Республика күніне орай Қазақстан мұсылмандары діни басқармасы Алматы өкілдігінің ұйымдастыруымен өткізілген «DASTUR FEST» көрмесінде салт-дәстүр шеруі ұсынылды.
Қазақ халқының ұлттық киімдері негізінен этникалық, экономиялық және климаттық жағдайларға сай ескеріліп, ежелгі дәстүрлер бойынша тігіледі. Шапан, күпі, кеудеше, тон, шидем десе, сулық киімдерге: шекпен, қаптал шапан, кебенек кенеп, сырттық деп атау берген сырт киім түрлері жұртшылық назарына көрсетілді. Әдетте шапандар мәуітіден, жүн және жібек матадан, киізден, аң терісінен тігілген. Отандық дизайнерлердің қолынан шыққан заман талабына сай күнделікті өмірде киюге арналған шапандар үлгілері жиналған көпшілік көңілінен шықты.
Ерлер көрсетіліміндегі шапандар шеруінен соң, апалар бастаған кимешек шеруін жұрт ықыласпен қарсы алды.
Қазақ әйелдерінің ұлттық киімі, негізінен, келек, кимешек, жаулық, сәукеле, желек, тақия, камзол, кәзекей, кебіс-мәсі, көкірекше деген киімдерден тұрады. Әйелдер киімі әшекей, ажар жағынан төрт топқа арналып тігіледі. Олар – қыз киімдері, келіншек киімдері, орта жастағы әйелдер мен бәйбішелердің киімдері. Қыз киімдері қынамалы, жаға, жең, өңірі кестелі, әшекейлі келсе, жасы ұлғайған сайын неғұрлым етекті, кең, мол қаусырмалы бола түскен.
Қазақ халқының ұлттық киімдерінде тұрғындардың географиялық, ру-тайпалық ерекшеліктері де көрініс табады. Оны көбіне бас киім мен шапанынан байқауға болады. Халқымыздың мол мәдениеті мен тарихының тереңдігі киім атауларынан-ақ көрінетінін шапандар мен кимешек шеруі дәлелдей түсті.
Алматы Орталық мешітінің баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
.jpg)
.jpg)
.jpg)
.jpg)
