«ҒАЖАП РАМАЗАН 2025» БАЙҚАУЫ ҚОРЫТЫНДЫЛАНДЫ

Нұр-Мүбарак мешітінде “Ғажап Рамазан 2025” байқауының жеңімпаздары марапатталды.
Қасиетті Қадір түні Нұр-Мүбарак мешітінде рухани кеш өтіп, “Ғажап Рамазан 2025” атты ерекше байқаудың жеңімпаздары салтанатты түрде марапатталды. Бұл игі шараға Нұр-Мүбарак университетінің проректоры Ершат Ағыбайұлы мен Алматы қаласының бас имамы Төлеби Оспан арнайы қатысып, жеңімпаздарды құттықтады.
Алматы қаласы жамағатынан қатысқан байқау жеңімпаздарына интеллектуалын, руханиятын және денсаулығын жетілдіретін сертификаттар тапсырылды. Ал Нұр-Мүбарак университеті студенттері арасынан озып шыққан студенттерге білімін жетілдіру үшін Малайзия, Түркия, Египет елдеріне оқу жолдамалары мен басқа да құнды сыйлықтар табысталды. Бұл марапаттар – жас таланттарды қолдау және олардың діни әрі рухани білімін шыңдауға мүмкіндік беру мақсатында ұсынылған.
Қасиетті айдың соңғы түндерінің бірі осылайша берекелі қуанышқа толып, рухани азыққа мол болды. Мұндай шаралар елімізде Ислам мәдениеті мен білімін дамытуға үлкен үлес қосып, жас ұрпақты ізгілікке, ғылымға және рухани кемелдікке жетелеуде.