АЛМАТЫДА ОРАЗА АЙТ НАМАЗЫ ОҚЫЛДЫ

Алматы қаласы бойынша 57 мешітте ораза айт намазы оқылды.
Ата-бабаларымыздың «Отыз күн оразаның бір айты бар, әр қылған жақсылықтың бір қайтымы бар» демекші, қасиетті Рамазан айы аяқталысымен барша мұсылман халықтарының ең ұлық мерекесі ораза айт та келіп жетті. Осындай ұлық мереке Ораза айт күні Алматы Орталық мешіті таңғы намаздан бастап жамағатқа лық толды. 10 000-ға жуық жиналған жамағатқа Қасиетті Құран аяттары оқылып, қаланың бас имамы Төлеби Дәділұлы "Ораза айт - ұлық мереке" тақырыбында уағыз айтты. Жамағатты ораза айт мерекесімен құттықтап, ел тыныштығы мен тұрақтылығы үшін бата жасады.
Сондай-ақ қаланың 57 мешітінде 130 000 ға жуық шаһар тұрғындары мерекені құлшылықпен бастап, екі ракағат айт намазын оқыды. Намаздан соң бір-бірін құттықтап, рамазан айындағы жасаған тағат-құлшылықтарының қабыл болуын тіледі. «Айт қабыл болсын!» деген құттықтау сөздерімен мерекелік көңіл күйге ұласты. Айт намазына келген жамағатқа дастархан жайылып, жастар арасында ұлттық ойындардан сайыстар ұйымдастырылды. Мешіт ақсақалдары бата беріп, ел амандығын тілеуде. Мерекелік көңіл-күй қала мешіттерінде жалғасуда.