500 АДАМҒА ҚАЙЫРЫМДЫЛЫҚ ШАРАСЫ ӨТТІ

Рамазан айының соңғы қасиетті жұма күні Алматы Орталық мешітінде 500 адамға арналған ауқымды қайырымдылық шарасы өтті.
Діни басқарманың 35 жылдығына және Рамазан айының құрметіне орай ұйымдастырылған қайырымдылық шарасына Алматы қаласының бас имамы Төлеби Оспан қатысып, Бас мүфти Наурызбай қажы Тағанұлының ыстық ықыласын жеткізді. «Рамазан айында қайырымдылық жасап, мұқтаж жандарға көмектесу – үлкен сауапты іс. Пайғамбарымыз Мұхаммед (оған Алланың салауаты мен сәлемі болсын): «Кімде-кім бауырының қажетін өтесе, Алла оның қажетінде болады» деген хадисті негізге ала қайырымдылық шарасына атсалысып, демеушілік жасаған кәсіпкер Әнуарбек ағамызға алғысымызды жеткіземіз», - деді.
ҚМДБ «Зекет және қайырымдылық» қорының Алматы қаласы бойынша жауапты маманы Бауыржан Көптілеуов пен еріктілер күнделікті тұтынатын азық-түліктер жиынтығын медресе шәкірттеріне, Орталық мешітте дәріс алатын 30 зағип жандарға және қала бойынша мүгедектер, ұйымдар мен қайырымдылық мекемелеріне табыстады. Сонымен қатар Орталық мешітте көмекке мұқтаж жандар тізіміндегі көпбалалы аналар, жалғыз басты аналарға т.б үлестірілді.