ЖЕҢІМПАЗ ЖАРАПАЗАН МӘТІНДЕРІ

Алматы Орталық мешітінің ұйымдастыруымен Жарапазан жырының жаңа мәтінін жазу байқауының қорытындысы бойынша жеңімпаз үш мәтінді назарларыңызға ұсынамыз.

1 орын 

ЖАРАПАЗАН ЖЫРЫ

Ау мұсылман, мұсылман,

Аллаға мойын ұсынған.

Келді міне ораза,

Иман, жүрек тұсыңнан.

Оразасын ұстаған,

Пенде нағыз күшті адам.

Сұлтан айды сүйіншілеп,

Келдік міне біз саған!

Ниетіңді байқайық,

Бата беріп қайтайық.

Ата-баба жолымен,

Жарапазан айтайық!

Ассалаумағалейкум Алты Алашым,

Төбеңнен иман нұры тарқамасын!

Әр пенде мұсылман боп туған екен,

Алланың бес парызын арқаласын!

Мұхаммед үмбеті айтқан жарапазан,

Оразаң қабыл болсын ұстаған жан!

Бес парыздың біреуі Ораза екен,

Иманың сонда нағыз толады екен.

Оразасын бекемдеп тұтқан жанның,

Мекені жұмақ төрі болады екен.

Мұхаммед үмбеті айтқан жарапазан,

Оразаң қабыл болсын ұстаған жан!

Мәнісін Оразаның ұға ма адам,

Бұл айда құран түскен бір Алладан.

Мың айдан қасиетті қадір түні,

Сұлтаны он екі айдың Рамазан!

Мұхаммед үмбеті айтқан жарапазан,

Оразаң қабыл болсын ұстаған жан!

Ораза шынжырлайды әзәзілді,

Бекемдеп иманыңды, кәләміңді.

Мың батпан күнәң болса кешіреді,

Арттырып әр жасаған сауабыңды.

Мұхаммед үмбеті айтқан жарапазан,

Оразаң қабыл болсын ұстаған жан!

Нәпсінің жетегіне көне қалма,

Амалыңның барлығын көреді Алла!

«Басқа айда өзің үшін сауап жисаң,

Ораза айы мен үшін» деген Алла!

Мұхаммед үмбеті айтқан жарапазан,

Оразаң қабыл болсын ұстаған жан!

Айтайын жарапазан шаңыраққа,

Мұсылманның үмбетін танымаққа.

Жарылқап ұлан-байтақ жерді берген,

Жақын болсын қазақтың жаны Хаққа!

Мұхаммед үмбеті айтқан жарапазан,

Оразаң қабыл болсын ұстаған жан!

Тыңдаңыз алтын жеңге, асыл ағам,

Алланың бергеніне тасымаған.

Арттырып несібеңді Ораза айы,

Болсыншы бауыр бүтін, басың аман!

Мұхаммед үмбеті айтқан жарапазан,

Оразаң қабыл болсын ұстаған жан!

Атарда табиғаттың таңы әдемі,

Ораза тұтқан қандай ғажап еді...

Жетейік Оразадан Оразаға,

Аман боп қасиетті Қазақ елі!

Мұхаммед үмбеті айтқан жарапазан,

Оразаң қабыл болсын ұстаған жан!

Жарапазан батасы:

Иа, Құдайым, Алла деп,

Жаратқаннан сұраңыз!

Бес парызды түгендеп,

Иман шартын құраңыз!

Бекем болсын бірлігің,

Оңды болсын тірлігің.

Жарық болсын жұлдызың.

Аман болсын ұл-қызың!

Толықтансын кемдігің,

Биік болсын елдігің.

Керегеңіз кең болып,

Теңселмесін теңдігің!

Бақыт қонсын басыңа,

Байлық келсін қасыңа!

Жас қосылып жасыңа,

Адалдық берсін асыңа!

Иман толып жүрегің,

Орындалсын тілегің!

Ұзақ жасап ұрпағың,

Ырза болсын Ұлы елің!

Арылтып өкпе, наладан,

Сақтасын бәле-жаладан.

Жамандық шықсын үйіңнен,

Жақсылық кірсін даладан!

Жарлықаушы, жалғыз деп,

Алланы ғана санаған,

Мұхамметтің үмбеті,

Қабыл болсын, Оразаң!

Әумин, Аллаһу акбар!

Авторы, Біләл Қуаныш

2 орын 

ЖАРАПАЗАН ЖЫРЫ

Он сегіз мың ғаламға,

Құран жеткен – Рамазан.

Руза тұтсаң қадірлеп,

Күнәң кеткен – Рамазан.

Ең сабырлы адамды

Асықтырған – Рамазан.

Ең күйгелек адамды,

Шыдамды еткен – Рамазан.

Қайырмасы:

Мұхаммед үмбеті айтқан жарапазан,

Оразаң қабыл болсын ұстаған жан!

Тоқ көңіл мен аш құрсақ,

Күн кештірген – Рамазан.

Қырағаты қаридың,

Түнде естілген – Рамазан.

Жастық пенен қарттықтың

Арасында бір уақыт

Жаның менен тәніңді

Тілдестірген – Рамазан

Артық ауыз сөзге де

Тыйым салар – Рамазан

Алақ-жұлақ көзге де

Тыйым салар – Рамазан

Алласы үшін нәпсіге

Ие болса әр адам

Ақыретте сыйлық пен

Сүйінші алар – Рамазан

Он екі айдың Сұлтаны

Ұлық айдан – Рамазан

Төгілетін күн тұрмақ,

Шұғыла айдан – Рамазан

Имамға ерген жақсы үшін

Түбі мейрам – Рамазан

Иман менен нәпсі үшін

Ұлы майдан – Рамазан

Қасиеті айтылған

Бар баянда – Рамазан

Он екі айда тең келер

Қандай айға Рамазан?

Үміт етіп ораза

Тұтқан әрбір мүмінді

Жетелейтін жалғыз ай

«Әр-Раянға» – Рамазан

Өткендерге батиқа

Бағыштатар – Рамазан

Оразаны отыз күн

Сақ ұстатар – Рамазан

Қалауымен Алланың

Бір күн тұтқан адамды

Жетпіс жылға тозақтан

Алыстатар – Рамазан

Қадіріне жете алар

Төзімділер – Рамазан

Қалауынан нәпсінің

Безіндірер – Рамазан

Тақуалық және де

Көркем мінез сипатын

Отыз күнде пендеге

Сезіндірер – Рамазан!

Авторы, ақын Еркебұлан Қайназар

3 орын 

ЖАРАПАЗАН ЖЫРЫ

Біссіміллә атыменен бір Алланың,

Бастаймыз жарапазан жыр-арнауын.

Таныған Әз Пайғамбар үмбетіміз,

Алла  хақ, ақиқат деп Құран Кәрім!

Айтайын айт дегенде жарапазан,

Бізді аман оразаға оразадан –

Жеткізген сансыз шүкір бір Аллаға,

Қош келдің қасиетті, уа Рамазан!

Сұлтаны он екі айдың сағындырған,

Тілекті жүректегі қабыл қылған!

Теңдессіз сыйы күтер Жаратқанның,

Пендесін ораза ұстап, сабыр қылған.

Айтамын жарапазан, құрметті елім,

Жақсылық, қайырымдылық – үлгі  еткенің.

Ассалаумағалейкум, адамзаттың

Асылы – Мұхаммеддің үмметтері!

Айтайық жарапазан болар аңыз,

Бұл айда тазарамыз, жаңарамыз.

Адамдар ниет еткен аузы берік,

Ұстаған қабыл болсын оразаңыз!

Ағайын салтты сақтап, дәстүр жалғар,

Ұсынар дастарханда ас-құрмаң бар.

Сауабың еселенсін рақым айы,

Ауызашар беріп, ауыз аштырғандар!

Кешірім, ізгілік пен береке айы,

Жақсылық, мейірім мен мереке айы,

Мол сауап, толы шексіз нығметке,

Бір күніне тең жылдың он екі айы.

Рамазан құт әкелсін баршаңызға,

Айтайын жарапазан ортаңызға!

Көрсетіп мырзалықты оразада,

Ниетпен сыйыңды сал қалтамызға!

Тыңдаңыз жарапазан осы арада,

Бақ-ырыс берсін Алла босағаңа.

Отыз күн ораза тұт, садақа бер,

Жақсылық, қолдан келсе жаса адамға!

Айтайын жарапазан әулетіңе,

Құдайым дәулет қоссын дәулетіңе.

Шүкір ет, тіршілік қыл, құлшылық қыл,

Мүмкіндік, уақыт барда тәубе етуге!

Арнайын отбасыңа жарапазан,

Үйіңде оттан түспей қара қазан.

Қабыл боп дұға-тілек, аман-есен,

Жетейік Рамазанға Рамазаннан!

* * *

Сүйін, сүйін, сүйінші,

Жамағатым жиылшы,

Қасиетті ай келді,

Жамандықтан тыйылшы.

Жаран, жаран, жарандар,

Бәрің бері қараңдар,

Жарапазан айтайық,

Жақсы-жақсы адамдар.

Ей, жүрегі таза жан,

Қабыл болсын оразаң!

Он екі айдың сұлтаны,

Келді міне Рамазан!

Сылдыр-сылдыр теңгеңіз,

Салып берсін жеңгеміз.

Жарапазан салтымен,

Үйіңізге келгенбіз.

Қалтамызға бағалы

Қағаз салсын ағамыз.

Мырза-мырза жан болса,

Ырза-ырза боламыз.

Сәресі мен ауызашар,

Ертең қайда жалғасар?!

Жарапазан айтамыз,

Жақсы тілек жолды ашар.

Айтамын жарапазан, құрметті елім,

Жақсылық, қайырымдылық – үлгі еткенің.

Үмбеті Мұхаммеддің – мұсылмандар,

Жадырап жайнай берсін гүл көктемің!

Авторы, Ботакөз Мұхиден

Астана қаласы

Байқау мақсаты - уақыт талабына сай жарапазан жырын жаңа үлгіде жазып, халыққа ұмыт болып бара жатқан жарапазан жырын айту дәстүрін жаңғырту.