БІЛІМ КҮНІНДЕ БАС ИМАМ МЕДРЕСЕ ШӘКІРТТЕРІМЕН КЕЗДЕСТІ
Алматы қаласының бас имамы Төлеби Оспан Әбу-Ханифа медресе-колледж шәкірттерімен кездесіп, Бас мүфти Наурызбай қажы Тағанұлының ыстық сәлемін жеткізді.
Қаланың бас имамы Төлеби Оспан шәкірттерді білім күнімен құттықтап, ілім-білім жайында тағылымды насихат айтты. «Бірінші қыркүйек – білімнің, жаңа жетістіктер мен жеңістердің, жаңа дос табудың, жаңа тәлімгерлермен кездесудің, білім әлеміне саяхаттың басталу күні.
Бұл күн үлкенге де, кішіге де бірдей қымбат. Өйткені, адам баласы қандай жетістіктерге жетсе де ол – алған білімі мен тәрбиесінен екені белгілі. Ел Президенті Қасым-Жомарт Кемелұлы атап өткендей, цифрлық дәуірдегі жаңа білім мен дағдылар жаңа буынның болашақ табысының кілті болып табылмақ.
Білім – баға жетпес қазына. Пайғамбарымыз Мұхаммед (оған Алланың салауаты мен сәлемі болсын): «Білім мен хикмет мұсылманның жоғалтқан қазынасы, қай жерден тапса да иемденіп алсын», – деген. Барша білім алушылар ел-жұртқа пайда әкелер білім ізденсе, оны өзгеге үйретсе – елге қосқан үлесі осы болмақ», - деп атап өтті бас имам. Сонымен қатар, қоғамдағы татулық пен келісімді сақтауға дін қызметкерінің де қосатын үлесі айрықша екенін айтып, дін қызметкерінің сөзі мен ісі қоғамдық санаға тікелей әсер ететіндіктен, оның біліктілігі мен жауапкершілігі ел бірлігінің маңызды кепілі болып табылатынын жеткізді.
Барша ұстаздар мен шәкірттерді білім күнімен құттықтап, жаңа оқу жылына сәттілік тілеп бата жасады.
Алматы Орталық мешітінің баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
