АЛМАТЫДА РУХАНИ МӘУЛІТ КЕШІ ӨТТІ
Қазақстан мұсылмандары діни басқармасының ұйымдастыруымен Алматыда «Отбасы және пайғамбар өнегесі» тақырыбында рухани мәуліт кеші өтті. Адамзаттың ардақтысы Пайғамбарымыз (оған Алланың салауаты мен сәлемі болсын) дүниеге келген мәуліт айының құрметіне өткен рухани кешке Бас мүфти Наурызбай қажы Тағанұлы арнайы қатысты.
ҚМДБ Төрағасы жиналған көпшілікті мүбәрак мәуліт айымен құттықтап, адамдарды Пайғамбарымыз (оған Алланың салауаты мен сәлемі болсын) насихаттаған ізгілік жолына, адамгершілік пен еңбекқорлыққа, сондай-ақ Құран Кәрімді құрметтеуге шақырды.
«Мұсылманның Пайғамбарға деген құрметін білдіретін көптеген амалдар бар. Сондай амалдардың маңыздысының бірі – Алла Елшісіне (оған Алланың салауаты мен сәлемі болсын) салауат айту. Алла Тағала қасиетті Құранда: «Расында Алла Пайғамбарға рахмет етіп, періштелер салауат айтады. Уа, иман еткендер! Сендер де пайғамбарға салауат айтып, сәлем жолдаңдар», – деп айтқан («Ахзаб» сүресі, 56-аят).Қасиетті мәуліт айында Алла Елшісін көбірек еске алып, өмірін насихаттап, көп салауат айтқан абзал.
Бүгінгі кештің де негізі мәні осыда. Сонымен қатар мінезімізді дұрыстауға көңіл бөлгеніміз жөн. Көрнекті жазушы Мұхтар Әуезов: «Өз топшылауым бойынша, адамның қай мінезі қасиетті болса, сол мінезінің міні де болады», – деген екен. Сондықтан мінсіз тұлға ол – Пайғамбарымыз (оған Алланың салауаты мен сәлемі болсын) екенін білуіміз керек. Ал біз оның ізгі қасиеттерін мінсіз меңгерсек те жеткілікті» деді Бас мүфти.
Зиялы қауым өкілдері, ақсақалдар мен мешіт жамағаты, имамдар мен қала тұрғындары қатысқан кеште ақындар, Қазақ ұлттық консерватория түлектері, Әуезов театрларының актерлері мен Қазақ ұлттық өнер академиясының студенттері сахналық қойылымдар қойды.
Шара соңында Мәуліт рухани кешінің билеттерінен түскен қаражатты Бас мүфти Наурызбай қажы Тағанұлы көпшіліктің алдында мұқтаж кісілерге қайырымдылық ретінде табыстады.
Тақырып бойынша жаңалықтар
Қызықты тақырыптар
Намаз уақыттары 
.jpg)
.jpg)
.jpg)
.jpg)
