АЛМАТЫДА ҚАЙЫРЫМДЫЛЫҚ МАРАФОНЫНДА 1270 ОТБАСЫНА АЗЫҚ-ТҮЛІК ТАРАТЫЛДЫ
Бүгін Қазақстан мұсылмандары діни басқармасының ұйымдастыруымен еліміз бойынша «Рамазан сыйы» қайырымдылық марафонына Алматы мешіттері де атсалысты.
Діни басқарманың 35 жылдығына және Рамазан айының құрметіне орай ұйымдастырылған қайырымдылық марафонына Алматы қаласы бойынша мешіттері де қатысып, бір мезетте 1270 отбасына азық-түліктер жиынтығы табысталды. Орталық мешітте өткен ауқымды қайырымдылық шарасына Алматы қаласының бас имамы Төлеби Дәділұлы қатысты. Қасиетті Рамазан айымен құттықтап, Бас мүфти Наурызбай қажы Тағанұлының ыстық ықыласын жеткізді. Елордада бастау алған қайырымдылық марафонында «Рамазан айында қайырымдылық жасап, мұқтаж жандарға көмектесу – үлкен сауапты іс. Пайғамбарымыз Мұхаммед (оған Алланың салауаты мен сәлемі болсын): «Кімде-кім бауырының қажетін өтесе, Алла оның қажетінде болады...» – деген хадисін жеткізе, қайырымдылық айының қасиетін атап өтті бас мүфти.
Мүфтият бастамасымен қолға алынған Қазақстан мұсылмандары діни басқармасының 35 жылдығына орай қасиетті Рамазан айынан басталған «35 мың азық-түлік себетін тарату» акциясы жыл бойы жалғасатынын айтты.
Бүгінгі өткен игі іс-шараға қала бойынша мешіт имамдары, «Зекет және қайырымдылық» қорының Алматы қаласы бойынша жауапты маманы Бауыржан Көптілеуов пен еріктілер, дін жанашырлары, демеуші азаматтар атсалысты.
Орталық мешітте 200 отбасына азық-түліктер жиынтығы үлестірілсе, Алатау ауданы бойынша 500 отбасына, Түрксіб ауданы бойынша 50 жанға азық-түліктер таратылды. Қалған 520 отбасына азық-түліктер салынған қораптарды Жетісу, Бостандық, Медеу, Алмалы аудандары үлестірді.
Тақырып бойынша жаңалықтар
Қызықты тақырыптар
Намаз уақыттары 
