«ИСЛАМ ӘДЕПТЕРІНІҢ ЭНЦИКЛОПЕДИЯСЫ» КІТАБЫНАН СЕМИНАР ӨТТІ
Алматы қаласы, Бостандық ауданындағы Нұрлытау мешітінің ұйымдастыруымен «Бір айда – бір кітап оқу» жобасымен «Ислам әдептерінің энциклопедиясы» рухани кітап оқу, талқылау семинары өтті.
Шараның ашылуында Алматы Орталық мешітінің ұстазы Әбдірасилов Ердәулет құттықтау сөз сөйлеп, рухани білімнің қоғамдағы орны мен кітап оқудың маңыздылығына тоқталды. Ол мұндай игі бастамалардың жамағаттың имани деңгейін көтеруге үлкен үлес қосатынын атап өтті. Аталған шараның мақсаты – жамағат арасында кітап оқу мәдениетін қалыптастыру, діни сауаттылықты арттыру және рухани дамуға жол ашу болды. Семинар барысында оқылған кітап мазмұны кеңінен талқыланып, қатысушылар өзара пікір алмасты. Шараға спикер ретінде ұстаз Азамат Жамашев қатысып, ислам әдебиеттерінің маңыздылығы, білім алудың артықшылығы және ілімді амалмен ұштастыру жайында тағылымды насихат айтты.
Сондай-ақ, Жаңалық ауылы Алаш арыстары мешітінің бас имамы Руслан ұстаз сөз сөйлеп, рухани тәрбиеде кітаптың орны ерекше екенін атап өтті. Сонымен қатар, Бесқайнар мешітінің имамы Әбілқайыр ұстаз да өзінің мазмұнды ойларын ортаға салып, жамағатты білім мен ізгі амалға үндейтін әсерлі насихат айтты. Кеш барысында дәстүрлі рухани термелер орындалып, қатысушылардың көңілінен шықты. Терме өнерін Құрманғазы атындағы Қазақ ұлттық консерваториясы тәлімгерлері мен өнерпаздары орындап, рухани кештің мәнін арттыра түсті. Жалпы шара жоғары деңгейде ұйымдастырылып, жамағат тарапынан оң бағасын алды. Мұндай рухани жобалар алдағы уақытта да жалғасын табады деген сенім мол. Алла Тағала ілімімізді арттырып, пайдалы білім нәсіп етсін!
Тақырып бойынша жаңалықтар
Қызықты тақырыптар
Намаз уақыттары 
