«ИСЛАМДАҒЫ САУДА-САТТЫҚ» КІТАБЫ ЖАМАҒАТҚА ТҮСІНДІРІЛДІ

Нұр-Мүбарак оқу-әдістемелік мешітінде «Бір айда бір кітап» жобасы аясында кезекті рухани басқосу өтті. Бұл жолғы басқосу Исламдағы сауда-саттық мәселелеріне арналған «Исламдағы сауда-саттық» атты кітап төңірегінде өрбіді.
Іс-шараны мешіттің бас имамы Жалғас Жақсыбекұлы жүргізіп, кітаптағы шариғи үкімдер мен сауда мәдениетіне қатысты маңызды тақырыптарды жамағатқа кеңінен түсіндіріп берді. Жиын барысында жамағат пен шәкірттер өзара сұрақ-жауап форматында пікір алмасып, күнделікті өмірде кездесетін сауда-саттық жағдайларын шариғаттың негізінде талқылады. Кітаптағы кейбір күрделі тұстарға тоқталып, нақты мысалдармен түсіндірулер жасалды.
Бұл саудадағы адалдық пен әділдікті ұстанудың қаншалықты маңызды екендігін терең сезінуге себеп болды. Жамағат мүшелері осындай рухани кездесулердің жиі өтіп тұруын қалайтындарын білдіріп, келесі айда өтетін жаңа кітапты асыға күтетіндерін жеткізді.