1-ҚЫРКҮЙЕК БІЛІМ КҮНІ ҚҰТТЫ БОЛСЫН!
1 – Қыркүйек білім күні!
Бүгінгі күні білім нәрімен сусындауға қадам басушы әрбір шәкіртті һәм ұлағатты ұстаздар қауымын мерекемен құттықтаймын!
Әлем екінші ұстаз деп танитын ғұлама Әл-Фараби бабамыз: «Бүгін, сіздің ыждаһаттылықпен білім алуыңыз отанымыздың дамуына жасалған үлкен үлес», - деп айтқанындай әрбір білім алушының мақсаты да ел игілігіне қызмет етуіне негізделгені абзал. Ұлттық жазудың реформаторы, ағартушы, мемлекет қайраткері Ахмет Байтұрсынұлы: «Білім – бір құрал. Білімі көп адам құралы сай ұста сықылды, не істесе де келістіріп істейді», - дейді. Расында, білімді терең меңгерген тәлімгер арасынан білікті дәрігер, кәсіби мұғалім, мықты құрылысшы, инженер, ғалымдар шығады. Ал, білімді болмақ үшін сол білім қазынасы болған мұғалімдерді құрметтеу әрі әр сабағын бар ықыласпен оқу қажет. Себебі, ата-бабамыз: «Ұстазы мықтының – ұстанымы мықты», - дейді.
Ғалымдар: «Ұстазыңды құрметте! Оның мәжілісінде (сыныпта) салмақты бол. Сөздеріне мұқият құлақ сал. Бар болмысыңмен тыңда. Оның алдында дауысыңды көтерме. Ұстазың жауап бермейінше сұрақ қойғанға жауап беруге асықпа. Сыныпта ешкіммен сөйлеспе. Мұғаліміңе біреу тіл тигізсе қорғай біл. Ұстазыңның жақсы қасиеттерін айт. Мұғаліміңді сыйлайтын кісілерге құрмет көрсет. Осылай етсең аспандағы періштелер сен білімді көзбояушылықпен емес ықыласпен үйрендің деп куәлік етеді», - деген екен.
Ислам ғалымы Малик ибн Динар (р.а.) бір сөзінде: «Оқыған білімі адамның оғаш мінезін түземесе, алған білімі еш пайдасын тигізбейді», - деп айтқан. Білім мен тәрбие құстың қос қанаты сияқты. Бір қанатты құс ұша алмайтыны белгілі. Тәрбие жоқ жерде білімнің де пайдасы жоқ. Осы ойды ұлт ұстазы Ахмет Байтұрсынұлы: «Жастардың оқу-тәрбие жұмысы түзелмей, жұрт ісі түзелмейді» деп жеткізеді.
Сондықтан, үздік оқумен қатар әдепті де болмақ керек. Әдепті бала –арлы бала. Әдеп – жақсы тәрбиенің белгісі. Оқушының әдебі мұғалімдерді құрметтеуі, сыныптас достарымен тату болуы. Тіпті кітаптарын ұқыпты ұстауы да әдептілікке жатады. Суфиян ибн Уйайнә (р.а.): «Білімнің басы – дұрыс құлақ асу, сосын көңілге тоқу. Мұнан кейін жаттау. Сосын білгенге амал ету. Кейін, білімімен бөлісу», - деп, зейінді білім иесі болуға жетелейді.
Құрметті балалар, оқушылар мен студент шәкірттер!
Сіздерді ең жарқын мереке - Білім күнімен құттықтаймын! Бірінші қыркүйек білімнің, жаңа жетістіктер мен жеңістердің, достармен және дана тәлімгерлермен кездесудің және қызықты әлемге саяхаттың басталу күні. Бұл күн бәріміз үшін маңызды, ол үлкенге де, кішіге де бірдей қымбат. Өйткені, адам өмірінде қандай биіктерге жетсе ол – алған білімінен екені белгілі. Президентіміз Қ.Тоқаев атап өткендей, цифрлық дәуірдегі жаңа білім мен дағдылар жаңа буынның болашақ табысының кілті болып табылады.
Сонымен қатар балаларға барлық уақыттары мен күштерін, білімдерін, жылы лебіздері мен шын жүректен жылулықтарын беретін ұстаздарымызға алғыс айтып, шәкірт жүрегіне даналықтың дәнін егуде қажымас қайрат тілеймін.
Жаңа оқу жылы барлығыңыз үшін сәтті және қуанышты болсын!
Алматы қаласының бас имамы
Төлеби ОСПАН
 Предыдущий |
Следующий |
| ҰЛТ ҰСТАЗЫ ҺӘМ ҰЛАҒАТТЫ ІС | БАРШАҒА ОРТАҚ ҚҰНДЫЛЫҚ |
Қызықты тақырыптар
Намаз уақыттары 
