ШЕТ ЕЛДЕ ДІНИ БІЛІМ АЛУ
Білім алу, сауатты болу – діннің талабы. Алла Тағала Құранның алғашқы аяттарын уахи еткіп түсіргенде «оқы» әмірімен басталды. Әрбір мұсылман адамның мойнында 40 парыз болса, оның соңғысы бесіктен бастап өмірінің соңына дейін білім алуы парыз амал. Діни біліммен қатар басқа да білімді қатар алып жүру, мықты мұсылманның сипаты.
Алла Тағала Құрандағы Зумар сүресінің 9 аятында: «Білетіндер мен білмейтіндер тең бола ма?» , деп ескерткен. Ардақты Пайғамбарымыз (оған Алланың салауаты мен сәлемі болсын) сахабаларына ілім алуды өзі үйреткен болатын. Мысалы, Бәдір соғысында қолға түскен мүшриктерге бастарына азаттық алулары үшін әрбіріне он баладан сауат аштыруды талап етіп, қаншама сахабалардың сауатын ашуға мүмкіндік жасайды. Білімсіздік мұсылман жамағатын жік-жікке бөліп, дінге қара күйе жақтырады. Білімді болу, жан-жақтылық қазіргі заман талабы. Дегенмен, ілімді қайда алғанымыз жөн?
Алла Елшісі (оған Алланың салауаты мен сәлемі болсын) ілім қайда болса, ізденіп алыңдар деген. Жастар діни білім алу үшін шет елге шығып жатады. Алайда шет елге шығып діни блім алу үшін, ол адамның бастапқы, яғни, базалық білімі болуы, немесе діни сауат ашу курсын бітірген болуы маңызды. Діни сауат ашу курсын мешіттен немесе имамдардың алдынан оқып шықса, ол адамның діни сана сезімі қалыптасып, жат ағымның жетегіне кетуінің алдын алады. Діни сауатын ашпай шет елге барып білім алып жатса, ақ-қараны ажырата алмай, жат ағымның жетегінде кетіп қалу ықтималдығы бар. Ең қиыны жат ағымның жетегінде кетсе, ертеңгі күні елімізге келіп бүлік шығарып қана қоймай, жастарымыздың санасын уламауына ешкім кепіл бола алмайды. Біздің айтарымыз діни сауатын имам-ұстаздардан ашып, қай жерге барып оқыса да, өз елінің тілін, мәдениетін, дәстүрін ұмытпау қажет.
Елімізде арнайы діни орта білім беретін 9 медресе бар. Олардың 5 еуі колледж дәрежесін алған. Оған қоса, «Нұр Мүбәрак» Египет ислам мәдениеті университеті бар. Қазіргі кезде жас мамандарды, діни кадрларды даярлап жатқан, жат елге шығуды талап етпейтін атақты діни ордамыз. Діни танымы мен көзқарасы дәстүрлі арнада қалыптасу үшін жастардың кәсіби діни білімді шет ел аспай-ақ, отандық оқу орындарында алуы аса маңызды. Елімізде жоғары және арнайы орта діни білім алу үшін барлық жағдай жасалған. Сондықтан жастарымыз діни білім алуда асықпай шешім қабылдап, ой елегінен өткізіп алғаны жөн. Алла пайдалы білім нәсіп етсін.
М. Табын
 Предыдущий |
Следующий |
| ПАЙҒАМБАРҒА ҚАТЫСТЫ 9 ӘДЕП | ДӘСТҮРДІҢ ОЗЫҒЫ МЕН ТОЗЫҒЫ |
Қызықты тақырыптар
Намаз уақыттары 
