МҰҚТАЖДЫҚ БІР СӘТ ҚАНА
Адамзат баласына жарық шамшырақ болған Ислам діні бүгінгі қоғамға мейірімділік пен жақсылықтың, қайырымдылық пен ізгіліктің жарқын үлгісін көрсетуді бұйырады. Қазіргі қоғамда қайырымды жандардың көмегіне зәру, жақсылығына мұқтаж адамдардың ішіндегі ерекше топ ретінде жарынан айырылып, тұрмыстың қиыншылығын тартқан жесір әйелдер мен белгілі бір себептермен ерінен ажырасқан әйелдер қауымын атап айтуға болады.
Бүгінде қилы тағдыр иелерінің ішінде жесір қалған, ерінен ажыраған көпбалалы аналардың тағдыры қоғамның мән беріп, мойын бұрар өзекті мәселесіне айналуда. Алайда, жесірін қаңғыртпаған, жетімін жылатпаған қазақ қоғамының қайырымдылық жібін жалғаған ізгі іс-әрекеті себепкерлігімен мұқтаж жандардың бір жыртығы жамалып, бір ауыры жеңілдеп жатқанының өзі көңіл қуантады.
Әрі Алла Тағала өзінің сүйікті құлын тағдырымен сынап, қиындық жіберсе де, әрбір пендесіне сол сынаққа төтеп берер, қиындыққа шыңдалар темірдей төзім мен мықты сабырды қоса береді. Кез келген қиындықтың артынан жеңілдіктің келері анық. Бұл турасында Қасиетті Құранда да айтылған. «Бақара» сүресінің 155-157 аяттарында: «Әрине сендерді қayiп-қатер, аштық және малдан, жаннан, сондай-ақ өнімдерден кеміту арқылы сынаймыз, (Мұхаммед! Сондай жағдайларда) сабыр етушілерді қуандыр! Қашан оларға бip қайғы жетсе, олар: «Шын мәнінде біз Аллаға тәнбіз әpi Оған қайтушымыз» – деді», - делінген. Сондай-ақ, «Бақара» сүресінің 214 аятында: «Әлде өздеріңнен бұрын өткен қауымдардың бастан өткергендері сендерге келмей тұрып жұмаққа кіреміз деп ойладыңдар ма? Олардың адам айтқысыз көптеген ауыртпалықтарға душар болып, күйзелгені соншалық, пайғамбар және онымен бірге иман келтіргендер «Алланың жәрдемі қашан келеді?» дейтіндей жағдайға жетті. Біле-білсеңдер, Алланың жәрдемі өте жақын», - деп сынақта жүрген адамның көңілін жайландырар медетке уәде етіледі.
Алла Тағала әйел баласын өте нәзік әрі әлсіз етіп жаратты. Жаратылысы нәзік әйел болғанымен, басына түскен тағдырға бойұсынып, мықты ер азаматтың демеуі болмаса да, бір өзі бар жауапкершілікті арқасына артқан бұндай әйелдердің қайсарлығына тәнті боласын. Дүниеге қиындықпен адам әкеліп, әрбір ауыртпалықты жеңе білген әйелдерге мықты қажыр мен төзім берген Алла Тағаланың мейірімділігі. Қиындықта қалган әйелдердің сабыры мен иманы биік болса, олардың екі дүниедегі жағдайы да биік болмақ. Омар ибн Хаттабтың (р.а.) риуаятында Алла Елшісі (оған Алланың салауаты мен сәлемі болсын): «Иманды әйел - қайырлы іс жасамайтын 1000 еркектен де қайырлы», - деген. Абу Хурайра (Алла оған разы болсын) риуаят еткен хадисте Алла Елшісі (оған Алланың салауаты мен сәлемі болсын) былай деген: «Егер әйел кісі бес уақыт намазын оқыса, Рамазан айында ораза тұтса және ар-намысын қорғап, күйеуіне бойұсынатын болса, онда оған: «Жұмаққа қалаған қақпасынан кір», - деп айтылады».
Қорыта айтқанда, барлық әйел адамның мәртебесін жоғары көтерген Ислам діні оларға мейірімділік танытуды, кұрмет көрсетуді насихаттайды. Ал тағдырдың тәлкегінде қалған мұқтаж әйелдерге жаксылық жасаудың сауабы өз алдына бір белек. Қайырымдылық пен
жақсылықтың бір тамшысын осы кісілерге де кеңінен бағыттауымыз керек. Өз кезегінде әрбір ізгі амалымызға хайырлы сауап берілмек.
«Әли Имран» сүресінің 92-аятында: «Сендер сүйген нәрселеріңді Алла жолында жұмсамайынша, әсте
жақсылыққа жете алмайсыңдар», - деп келтірілгеніндей, жасаған
жақсылығымыздың, қарымы тек жақсылық болмақ. Хәкім Абай: «Өзің үшін еңбек қылсаң, өзі үшін оттаған хайуанның бірі боласың; адамшылықтың қарызы үшін еңбек қылсаң - Алланың сүйген кұлының бірі боласын», - деп айтып өткеніндей, баршамызға айналамызга жаксылық жасаушы Алланың сүйікті кұлдарынан болуды нәсіп етсін.
ҚМДБ "Зекет және қайырымдылық" қоры
Алматы қаласы бойынша жауапты маманы
Бауыржан Көптілеуов
 Предыдущий |
Следующий |
| Шарапаты мол шағбан айы | СӘЛӘФИЗМ САНАСЫНЫҢ ҚАЛЫПТАСУЫ |
Қызықты тақырыптар
Намаз уақыттары 
