ТОҒЫЗ АЙ ТОҚТАМАҒАН ҚАЙЫРЫМДЫЛЫҚ
Алматы өкілдігінде ҚМДБ Зекет және қайырымдылық қорының ұйымдастыруымен 9 ай бойында 1800 отбасына үздіксіз азық-түлік үлестірілді.
Діни басқарманың 35 жылдығы және Ислам және отбасы құндылығы жылы аясында ұйымдастырылған қайырымдылық шарасына бір кәсіпкер 9 ай бойы демеушілік көрсетуімен қала тұрғындарына қайырымдылық шарасы өткізіліп келеді. Қайырымдылық ретінде бір айлық толық азық-түлікпен қамтамасыз етілген себеттер көп балалы отбасыларына, әлеуметтік көмекке мұқтаж жандар мен мешіттің техникалық қызметкерлеріне үлестірілді.
Іс-шараға Алматы қаласының бас имамы Төлеби Оспан қатысып, кәсіпкер азаматқа және отбасына Бас мүфти Наурызбай қажы Тағанұлының ыстық ықыласын жеткізді. «Қайырымдылық жасап, мұқтаж жандарға көмектесу – үлкен сауапты іс. Пайғамбарымыз Мұхаммед (оған Алланың салауаты мен сәлемі болсын): «Кімде-кім бауырының қажетін өтесе, Алла оның қажетінде болады» деген хадисті негізге ала қайырымдылық шарасына атсалысып, демеушілік жасаған кәсіпкер бауырымызға алғысымызды жеткіземіз», - деді.
ҚМДБ «Зекет және қайырымдылық» қорының Алматы қаласы бойынша жауапты маманы Бауыржан Көптілеуов пен еріктілер әр айдың басында азық-түліктер жиынтығын тізім бойынша беріп келеді. 40 келіден салынған азық-түлік себеті әр айда 200 отбасына үлестіріледі. Жалпы алғанда бүгінгі күнге дейін 1800 отбасы 72 000 тонна азық-түлікпен қамтамасыз етілді. «Зекет және қайырымдылық» қоры Алматы өкілдігі бойынша қала мешіттерінде бұдан басқа да «Жылулық сыйла» жобасы бойынша азық-түлік себеттері үлестірілуде. Тұрғындар мен қайырымдылық үлесін алған отбасы мүшелері ұйымдастырушылар мен кәсіпкер азаматқа алғыстарын айтып, істеріне береке тілесті. Айта кету керек, Алматы өкілдігі бойынша мұндай қайырымдылық шарасы әлі де жалғасын таппақ.
Алматы өкілдігі бойынша баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
.jpg)
.jpg)
.jpg)
