«КЕЛІН - ҰРПАҚТЫҢ АНАСЫ, ДӘСТҮР - ҰЛТТЫҢ ТАМЫРЫ» ТАҚЫРЫБЫНДА КЕЗДЕСУ ӨТТІ
Алматыдағы «Нұр-Мүбарак» мешітінде неке қидырған жастардың қатысуымен ұлттық құндылықтарды дәріптейтін «КЕЛІН - ҰРПАҚТЫҢ АНАСЫ, ДӘСТҮР - ҰЛТТЫҢ ТАМЫРЫ» атты тағылымды іс-шара өтті. Бұл жиын халқымыздың ұлттық салт-дәстүрі мен асыл дініміздің сабақтастығын дәріптеуге арналды.
ҚМДБ-ның «Дін мен дәстүр» бөлімінің меңгерушісі Нұрбек Есмағанбет жиналған жамағатқа өнегелі уағыз айтып, имандылық пен дәстүрдің үйлесіміне тоқталды. Ол сондай-ақ жас бүлдіршіннің тұсауын кесіп, ақ батасын берді. Ал Алматы қаласы Орталық мешітінің наиб имамы Бекзат Сыздықов нәрестенің құлағына азан шақырып, есімін қойды. Бұл – ата-бабамыздан жалғасқан игі амалдардың көрінісі еді.
Сондай-ақ, қазақтың қазыналы аналарының бірі, ұлт тәрбиесіне ерекше үлес қосып жүрген Құралай Жарбол апа бесікке салу дәстүрін көрнекі түрде көрсетіп, оның тәрбиелік мәнін түсіндірді. Көпшілік бесіктің қасиеті мен оның бала тәрбиесіндегі маңызын ұғынып, ұлттық мұраға деген сүйіспеншіліктерін тағы бір мәрте жаңғыртты.
Іс-шараға Исламтану PhD докторы, «Нұр-Мүбарак» университетінің профессоры Шәмшат Әділбаева қатысты, жүрекке жылы, рухани терең уағыз айтты. Ол қазақ халқының салт-дәстүрі мен Ислам дінінің байланысын айшықтап, имандылықтың өміріміздегі маңызын түсіндірді. Жиын соңында көпшілік үшін дұға жасап, береке мен бірлік тіледі.
Осылайша, бұл іс-шарада асыл дініміз бен ұлттық дәстүріміздің біте қайнасқан жарасымды көрінісі айқын сезілді. Ұлттық құндылықтарымыз бен діни салт-жоралғыларымыз бір-бірін толықтырып, ұрпақтан-ұрпаққа жалғасып келе жатқан асыл мұрамыздың мәңгілік екенін тағы да дәлелдей түсті.
Тақырып бойынша жаңалықтар
Қызықты тақырыптар
Намаз уақыттары 
.jpg)
.jpg)
.jpg)
.jpg)
