ДІНИ БАСҚАРМА АЛМАТЫДА АУЫЗАШАР БЕРДІ
Алматыда Қазақстан мұсылмандары діни басқармасының ұйымдастыруымен зиялы қауым өкілдеріне, мүфтият жанындағы Ақсақалдар, Сарапшылар мен Жастар кеңесінің мүшелеріне, бұқаралық ақпарат құралдары қызметкерлеріне, сондай-ақ қарттар үйіндегі қариялар мен балалар үйінің тәрбиеленушілеріне ауызашар берілді.
Игі басқосуда Бас мүфти Наурызбай қажы Тағанұлы: «Рамазан – Алланы жақсы көруге жетелейтін ай. Шын мәнінде, ораза ұстаған пенде Алланың разылығын алу үшін әрбір әрекетін ой елегінен өткізеді. Күндіз ішіп-жеуден, тілін жаман сөзден, құлағын жаман нәрсені тыңдаудан, бүкіл болмысын жамандықтан алыс ұстауға тырысады. Бұл – Аллаға нағыз иман келтірген мұсылманның сипаты. Бұған қатысты Құранда: «Ал иман келтіргендер Алланы бәрінен артық жақсы көреді» («Бақара» сүресі, 165-аят) делінген.
Рамазан – қанағатшылдыққа үйрететін ай. Жылына кем дегенде бір ай қатарынан ашыққан адам бір жұтым қара судың қадіріне жетеді. Біздің халық талай зұлматты заманды бастан кешті. Талай ашаршылық жылдар өтті. Бір үзім нанның өзі қол жетпес арманға айналған кездер болды. «Аштықта жеген құйқаның, дәмі кетпес ауыздан» деген сөздің мәні осында жатса керек.
Ораза Құдайдың бергеніне разы болатын күйге бөлейді. Рамазаннан өзге айларда адам қолында бар нығметтің қадірін білмей, қанағатсыздыққа душар болуы әбден мүмкін. Ардақты Пайғамбарымыздың (оған Алланың салауаты мен сәлемі болсын): «Құдайдың бергеніне разы болсаң, ең бай адамның бірі боласың. Ақиқатында қанағатты ту еткендерді Алла Тағала байытады», – деген хадисі қанағатшылдыққа үйретеді», – деді.
Өз кезегінде рухани кештің құрметті қонақтары, ел ағалары Бас мүфти Наурызбай қажы Тағанұлына алғыс айтып, Діни басқарманың руханият саласындағы ауқымды істеріне тілектестігін білдірді. Танымал өнер жұлдыздары дәстүрлі ән-термелерімен қонақтарға ерекше көңіл-күй сыйлап, Жарапазан жырын айтты. Кеш соңында ауызашар қонақтарына Рамазан сыйлығы табыс етілді, одан бөлек қарттар үйінен келген қариялар мен балалар үйінің тәрбиеленушілеріне арнайы сый-сияпат жасалды.
Тақырып бойынша жаңалықтар
Қызықты тақырыптар
Намаз уақыттары 
.jpg)
.jpg)
.jpg)
.jpg)
