АУДАН ИМАМЫ АУЫСТЫ
![](/media/images/66d1c44026773.jpg)
Бүгін ҚМДБ Төрағасы, Бас мүфти Наурызбай қажы Тағанұлының жаңа тағайындаулар бойынша бұйрығы жамағатқа таныстырылды.
Қасиетті жұма күні Алматы қаласының бас имамы Төлеби Оспан «Әбу Бәкір» мешітінде «Білім іздену – құлшылық» тақырыбында уағыз айтып, жұма намазын жүргізді.
Жұма насихаты барысында: «Білім іздеу – тал бесіктен, жер бесікке дейін парыз. Санаулы күндерден соң жаңа оқу жылы басталмақ. Балаға жұмсалатын ең басты инвестиция – білім. Біздің алдымызда білімді де ұлтжанды һәм иманды ұрпақ тәрбиелеу міндеті тұр. Барша оқушыларға Жаратушы Иеміз пайдалы білім бергей!», – деп түйіндеді бас имам.
Уағыз соңында Төлеби Дәділұлы жамағатқа Бас мүфти бұйрығымен Алматы қаласы, Наурызбай аудандық «Әбу Бәкір» мешітінің бас имамы болып тағайындалған Көптілеуов Бақытжан Жаңбырбайұлын таныстырды. Б.Көптілеуов бұған дейін Алматы қаласы, Жетісу аудандық «Әл-Мадина» мешітінің бас имамы қызметін ұзақ жылдар абыроймен атқарған.
Ал, бұған дейін аталмыш мешіттің бас имамы болған Тағаев Нұрбол Сайлауұлы Алматы қаласы, Жетісу аудандық «Әл-Мадина» мешітіне наиб имам болып ауысты. Оған бас имам атынан алғыс хат беріліп, қазақи дәстүр бойынша иығына шапан жапты.
Дін қызметіндегі имамдарға асыл дініміз исламға қалтқысыз қызмет етулеріне сәттілік тілейміз!
Алматы өкілдігі бойынша
баспасөз қызметі