ДІНИ АҚПАРАТ ЖӘНЕ КЕҢЕС БЕРУ ОРТАЛЫҒЫ МЕШІТ ҒИМАРАТЫНА АУЫСТЫ
Алматы қаласының бас имамы Төлеби Оспан Орталық мешіттің жанынан «Діни ақпарат және кеңес беру» орталығының ашылуына қатысты.
ҚМДБ-ның «Шариғат және Пәтуа» бөлімінің бастамасымен 4 жыл алдын Алматы қаласындағы мүфтият ғимаратынан діни сұрақтарға жауап беретін кеңес беру орталығы ашылған болатын. Қала тұрғындары бұл орталықтан күнделікті өмірде, қоғам мен отбасыда кезігетін түйткілді мәселелер мен сауалдарға жауап алып келді.
Ендігі кезекте Орталық мешіттің М.Мәметова көшесі бойында құрылысы аяқталған жапсарлас бөлігінен мешітке келуші тұрғындарға қолайлы болуы үшін арнайы орын белгіленді.
«Муфтият халықтың діни сұрақтарына дер кезінде жауап беру мақсатында барлық үлкен мешіттерден «діни ақпарат және кеңес беру» орталықтарын ашты. Өйткені, жастар сауалына жауап таппаған жағдайда әртүрлі теріс ағым арбауына түсіп қалады. Сондықтан бұл орталықтың қызметі маңызды. Мұнда 7 білікті діни маман бекітілген. Имамдар отбасы, сауда-саттық, неке, талақ т.б. мәселелер бойынша тұрғындардың көкейтесті сауалдарына жауап береді», - деп атап өтті қаланың бас имамы Төлеби Оспан.
Естеріңізге сала кетейік, ҚМДБ-ның «Шариғат және Пәтуа» бөлімінің Алматы қаласы бойынша жауапты маманы Тимур Әлиев пен пәтуаға жауапты кезекші имамдар аптаның алты күнінде 9:00-18:00 уақыт аралығында діни сұрақтарға және тұрғындардың отбасы мәселелері бойынша тағы басқа сұрақтары бойынша қабылдайды. Сондай-ақ, тұрғындар байланыс телефоны арқылы да хабарласуларына болады.
Мекен-жайы: Алматы Орталық мешіті, Пушкин көшесі, 16. (М.Мәметова көшесі жағынан).
Телефоны: +7707 939 77 08.
Эл. поштасы: almaty.fatua@mail.ru
Жұмыс уақыты: Дүйсенбі-Сенбі күндері 9:00-18:00 аралығында.
Алматы Орталық мешітінің
Баспасөз қызметі
Интересные материалы
Время намаза 
