ЖАТ АҒЫМҒА ҚАЗАҚЫЛЫҒЫМЫЗ ТОЙТАРЫС БЕРЕДІ
Шын мәнінде теріс түсініктер мен шетін көзқарастарды насихаттайтын діни ағымдар ең алдымен ұлттың ұстынына айналған құндылықтарымызды жоюға күш салады. Қоғамдағы татулық пен тұрақтылыққа қауіп төндіретін теріс ағымдар ешқандай да тіркеуден өтпейді. Сондай іс-әрекеттеріне қарамастан халық арасында алдап-арбау арқылы үгіт-насихаттарын белсенді жүргізіп келе жатқан оларға қарсы тұрудың бірден-бір жолы – халық арасында теріс ағымдар жайлы жиі сөз көтеріп, діни сауатты ашу. Діни фундаменті дұрыс орныққан, ақпаратты сараптай алатын сауатты жандар ғана олардан келетін қауіптерге қарсы тұра алады. Бір сөзбен айтқанда, әрқайсымыз теріс ағымдарға қауқар көрсете алатындай деңгейде болуымыз керек.
Әлем картасынан орын тепкен кез-келген мемлекетті алсаңыз да, олар ұлттық құндылықтарды дамыту арқылы және оларды ұрпақ санасына сіңіру арқылы қоғамның рухани жаңғыруына мүдделі болады. Ал теріс пиғылды ағымдар керісінше осы елдік мақсатқа қарсы жұмыс істейді. Кейбірі тіпті елдігімізге сызат түсіріп, халықты көрсоқырлыққа, мәңгүртікке итермелегісі келеді және сол арқылы ішкі тұрақтылықты ыдыратуды көздейді. Бір сөзбен айтқанда, бұлар мемлекеттің бүтіндігі мен қауіпсіздігіне анағұрлым нұқсан келтіреді. Міне сондықтан да сонау бағзы заманнан күні бүгінге дейін сақталып келе жатқан ұлтты ұйыстырушы салт-дәстүрлеріміз бен тарихи құндылықтарымызды қорғау біз үшін аса маңызды. Ол үшін ата-бабамыздан қалған «татулық», «тұрақтылық», «бірлік» идеологиясын қоғамға дендеп енгізіп, ар тазалығы мен жан тазалығын насихаттайтын ұлттық құндылықтарымызды жаңғыртуымыз қажет. Сонда ғана өскелең ұрпақ жат ағымдардың жетегіне ермей, психологиялық ықпалынан аулақ болады.
Анығында әрбіріміз үшін ұлттық рухани құндылықтарымыз жат ағымдармен күресте қалқан бола алады. Діни сипаттағы қажеттілік пен сұранысты реттеу арқылы жалпыадамзатқа ортақ мәңгілік құндылықтарды жаңаша насихаттау бағытында да біршама жұмыстар атқарылуы тиіс. Ол келешекте өз кезегінде қоғам өмірінде ұстанатын басты бағдарға айналады.
Айналадағы бірқатар замандастарымыз дінді бөлек наным-сенім деп қарамайды, керісінше, рухани құндылық ретінде бағалап, оған жан-тәнімен беріледі. Өмірін дінге негіздейді. Сондықтан халықтың діни сауатын ашу мемлекет үшін аса маңызды қадам болмақ. Ол үшін мектеп қабырғасынан бастап дәстүрлі рухани құндылықтарды дұрыс насихаттасақ, жас өскіннің толыққанды, жоғары рухани, зиялы, игілікке құштар, жақсы адам болып қалыптасуына ықпал етеміз. Халқымыздың басым бөлігін осылай тәрбиеленген жандар құраса игі емес пе. Осындай адамдар теріс ағымда жүргендердің үнін басып кетеді. Бұл біздің артықшылығымыз бен жеңісіміз болмақ. Бірақ оған масаттанып кетуге тағы да болмайды. Бұл ұзақ аралықта жүргізілуі тиіс процесс.
Дін – бұл сенім жүйесі ғана емес, өмір сүру стилі, қарым-қатынастар нормасы. Жақсылықты жамандықтан тиятын, адамгершілікке, ізгілікке бастайтын моральдық нормалар жиынтығы. Бір сөзбен айтар болсақ, дін – қоғамдағы басқа құбылыстармен салыстырғанда әлдеқайда маңыздылыққа ие, мәні мен мазмұны бай, рухани феномен. Дін мәселесін дінді танып-білгенде ғана шешуге болады. Сырттан тон пішіп, өз қазанында қайнамағн соң сын айту, пікір білдіру әрине оңай. Бірақ та оған тарпа бас салып, белден басу жүрмейді. Мәселен, толеранттылық деген еріксізден көну, илану емес, бұл мыңдаған жылдар бойғы қазақтың өмір сүру тәжірибесіне сүйене отырып негізделген, ақылмен құрылған ымыра. Яғни, тәртіпті, байыпты, тәрбиелі адамның әрекеті. Басқаша айтқанда, бұл қарапайымдылық немесе төзімділік те емес. Ол адам бойындағы шексіздік, бейбітсүйгіштік, кеңпейілділік сынды асыл қасиеттердің жиынтығы. Қысқасы, ата-бабамыздан мұраға қалған өлшеусіз рухани құндылық. Анығында – қазақылығымыз. Ал қазақылығымыз кез келген күшке төтеп бере алады.
Осыны дұрыс ұғынып, таразылауымыз керек. Ол үшін осы қастерлі ұғымның мән-мағынасын бұзып, бұрмалап, көнбістік ретінде көрсетіп, өзімізге қарсы қолданғысы келетін жат пиғылдылармен бір жеңген қол, бір жағадан бас шығару арқылы күресуіміз керек.
Сапарбек Абылай Асқатұлы
Түрксіб ауданы
"Ынтымақ-1" мешітінің наиб имамы
 Предыдущий |
Следующий |
| ДІН МЕН ДӘСТҮР - ДІҢГЕГІМ! | ДІНИ ТАҢДАУ ДЕРБЕСТІГІ |
Қызықты тақырыптар
Намаз уақыттары 
