«ТАУГҮЛ» МЕШІТІНДЕ ӘЙЕЛ ЖАМАҒАТЫ АЙТ МЕРЕКЕСІН ТОЙЛАДЫ
Алматы қаласы, Әуезов ауданы «Таугүл» мешітінде әйел-қыздар жамағатына арнап айттық шара өткізілді.
Айттық мереке Құран Кәрім оқумен басталып, бас имам Руслан Қамбар «Әйел - ана» тақырыбында уағыз-насихат айтты. Мерекеге сауат ашу курсына қатысушы жүзден астам қыз-келіншек пен бүлдіршіндер шақырылды. Ойын-сауық және танымдық форматта өткен мерекеде салт-дәстүр, мақал-мәтелге қатысты сұрақ-жауап, интеллектуалды ойындар болды.
Іс-шара ерекшелігінің бірі әйел жамағатына қол күрес, арқан тартыс, асық ату сияқты ұлттық ойындардан сайыс ұйымдастырылды. Сонымен қатар, дәріс алушы шәкірттер «Адай» және «Балбырауын» күйлерін шебер орындады. Алуан түрлі айттық сыйлық алып, көңіл көтеруге шақырылған аниматорлармен ойнаған балалар мәз мейрам болды. Мереке қонақтарына арнайы ұлттық дәм қойылған айттық дастарқан жайылып, наурыз көже таратылды.
Алматы өкілдігі бойынша баспасөз қызметі












