ДҮНИЕЖҮЗІЛІК ЖАСТАР КҮНІНЕ ОРАЙ ИМАМДАР АРАСЫНДА ФУТБОЛДАН ТУРНИР ӨТТІ
Дүниежүзілік жастар күніне орай «Жастар – руханият шамшырағы» атты Алматы қаласының бас имамы Төлеби Дәділұлының бастамасымен дін қызметкерлері арасында шағын футболдан турнир ұйымдастырылды.
Әуезов ауданы имамдарының ұйымдастыруымен өткен спорттық додаға қала мешіттерінің имамдарынан құралған 8 команда қатысып, өзара бақ сынасты.
Турнир топтық кезең және плей-офф кезеңі бойынша өтті. Салауатты өмір салтын насихаттауды мақсат еткен жарыс барысында командалар жоғары дайындық пен ұйымшылдық танытып, тартысты ойын өрнегін көрсетті.
Жарыс қорытындысы бойынша жүлделі орындар төмендегідей бөлінді:
І орын – Әуезов ауданы;
ІІ орын – Наурызбай ауданы;
ІІІ орын – Түрксіб ауданы.
Сонымен қатар турнирдің үздік ойыншылары анықталды:
* Үздік ойыншы: Әбдіқадыров Бақдәулет;
* Үздік қақпашы: Алданазаров Жәнібек.
Жарыс соңында барлық қатысушылар Ақсай мешітінде арнайы жайылған дастарқаннан дәм татып, өзара сыйластық пен бауырмалдықтың үлгісін көрсетті.
Сондай-ақ турнир қатысушыларына ынталандыру мақсатында жаттығу залына бір жылдық абонементтер сыйға тартылды.
Аталған шара дін қызметкерлері арасындағы бірлік пен ынтымақты нығайтып қана қоймай, салауатты өмір салтын дәріптеуге және имамдардың дене шынықтырумен тұрақты айналысуына серпін берді.
Тақырып бойынша жаңалықтар
Қызықты тақырыптар
Намаз уақыттары 
