АЛМАТЫЛЫҚ ДІН ҚЫЗМЕТКЕРЛЕРІ КЕЗЕКТІ АТТЕСТАЦИЯДАН ӨТУДЕ
Бүгін Қазақстан мұсылмандары діни басқарамасының ұйымдастыруымен Алматы қаласындағы діни қызметкерлер кезекті аттестация тапсыруды бастады.
Алматы Орталық мешітінде өтіп жатқан біліктілікті арттыру сынағында ҚМДБ-ның төраға орынбасары, наиб мүфти Кенжетай қажы Байкемелұлы, ҚМДБ-ның Дін істері және талдау бөлімінің меңгерушісі Асан Тлеубердиев, ҚМДБ Құран секторының меңгерушісі Серік Ахметов, Шариғат және пәтуа бөлімінің маманы Бауыржан Әбдуали имамдардың діни білім деңгейін анықтап, бағалайтын болады.
Өз кезегінде сөз алған наиб мүфти Кенжетай қажы Байкемелұлы Бас мүфти Наурызбай қажы Тағанұлы хазреттің сәлемін жеткізіп, аттестациядан өтуші дін қызметкерлеріне сәттілік тіледі.
Бұл аттестацияға Алматы қаласы бойынша 56 мешіттің 230-ға жуық діни қызметкері (бас имам, наиб имам, ұстаз, молда және азаншы) қатысуда. Аттестация 3 күнге жоспарланған.
ҚМДБ бастамасымен жүзеге асып жатқан бұл шара елімізде дін саласында қызмет етіп жүрген имамдардың діни біліктілігін арттыру мен діни білімдерін үздіксіз дамытып отыруды көздейді. Әрі осы сынақ-емтиханы арқылы имамдардың жан-жақты білімін шыңдауға мүмкіндік бермек.





















