Алматы Орталық мешіті: Смановтар отбасына көңіл айтамыз
"Сарыағаш" медресе-колледжінің директоры, белгілі дін жанашыры, білікті ұстазымыз Әбдіғаппар Смановтың қазасы туралы қаралы хабарды естігенде қабырғамыз қайысып, ауыр күйзелісте қалдық. Бұл жағдай Алматы жұртшылығы мен жамағатқа да ауыр тиіп отыр. Осы орайда Алматы Орталық мешіті ұжымының атынан Смановтар отбасына қазаның арты қайырлы болсын деп қайғыларыңызға ортақтаса отырып көңіл айтамыз.
Әбдіғаппар Шәкірұлы өзінің саналы ғұмырында дін исламның өркендеуіне өлшеусіз үлес қосып, қазақ баласының діни білімі мен сауатының артуы үшін медресе ашқан, мұсылман қауымның иманын күшейту жолында тәлімді уағыз-насихаттарын айтып өткен біртуар азаматымыз, асыл ұстазымыз еді. Алла Тағала Әбдіғаппар Шәкірұлын өз рахымына бөлеп, нұрын пейіште шалқытсын. Осы дүниеде жасаған ізгі амалдарын өзіне шапағатшы қылып, иманын серік етсін. Сондай-ақ, артында қалған ағайын-туысы мен отбасына Алладан көркем сабыр тілейміз.
Алла Тағала егеменді еліміз мен әлем жұртшылығын жұқпалы індеттен аман етіп, басымызға түскен қиындықтарды құлшылық пен көркем сабырмен жеңіп шығуымызды нәсіп етсін. Әмин.
Алматы Орталық мешітінің ұжымы
Интересные материалы
Время намаза 
