ҚҰРАН КӘРІМНІҢ ҚАДІР ҚАСИЕТІ
![](/media/images/616a7f347aa78.jpg)
Қасиетті Құран Кәрімді оқудың артықшылығы жайлы Пайғамбарымыздың (оған Алланың салауаты мен сәлемі болсын) хадисінде былай деді: «Алла кітабынан бір әріп оқығанға бір жақсылық бар, ол он есе жақсылық болып жазылады. (яғни, әрбір әріпіне он сауап беріледі). Мен әлиф, ләм, мим – бір әріп демеймін. Әлиф – бір әріп, ләм- бір әріп, мим – бір әріп деп айтамын»[ [1.б,16]] - деген. Біз, мұсылман үмбеттеріне Құран Кәрімді оқуымызға ынталандырған. Құран Кәрімнің әрбір әріпіне он еселеніп сауап берілсе, Құранды хатым етіп түгел оқып бітірудің сауабы өте көп екенін білеміз.
Исламның алғашқы жылдарында сахабалар Құран Кәрімді жасырын оқыған. Кешегі қылышынан қан тамған кеңес уақытында да ата- бабаларымыз намазы мен Құранын тастамағаны тарихтан белгілі. Өткен замандарда ауыл бойынша бір Құран Кәрім болып, оны оқу үшін хат танитын сауаттылары көшіріп алып бір-біріне таратқан. Ал қазіргі уақытта барлық адамның Құран Кәрімді алып, жатқа оқуына еш кедергі жоқ. Араб тілін үйренемін деген әрбір жанға, мешіттерде сауат ашу курстары ұйымдастылып, мол мүмкіншілік қарастырылған.
Алла Құран Кәрімде былай дейді: «Әй, адамдар! Жаратушыларыңнан сендерге насихат болған, жүректегі дертке дауа, мұсылмандарға тура жол және жарылқау болған (Құран) келді»[2.б,57] деген.
Алла Құран Кәрімді оқығанда сауап болумен қатар, мұсылмандарға шипа бар екенін баяндайды. Құран Кәрімді оқып адамдарға дем салса, дәрі – дәрмекпен жазылмаған адамдар, дем салумен жазылғандығы жеткен. Құран Кәрім адамдарға тура жол бастаушы екені, шынында да ішінде баяндалған үкімдер адамдарды тек жақсылыққа, адамгершілікке, игі істер жасауға үндейді. Құранды оқыған адамдардың жүрегі тынышталып, көңілдері жадырап қалады. Себебі Пайғамбарымыз (оған Алланың салауаты мен сәлмі болсын) былай деген: «Үйлеріңізде Құран Кәрімді көп оқыңыздар. Себебі, Құран оқылмаған үйде жақсылық, береке аз болады. Ондай үй қиыншылықтан көз ашпайды»[3.б,21].
Ондай үйде тынышытық болмайды екен. Құран - мұсылмандарға үмітке толы өмір сыйлайтын қасиетті кітап.
Жетісу ауданы
«Сұлтан Қорған» мешітінің наиб
имамы Байдуллаев Унербай
Қолданылған әдебиеттер тізімі
- Фадайлул Құран, Термизи, 16
- Құран Кәрім, Халифа Алтай, мадина, 1991ж
- Фадайл Құран, Сахих Бұхари, 21