Жанболат САПАШОВ: Сенімге селкеу түспесін
![](/media/images/5fb24cbee2364.jpg)
Исламдағы наным-сенім, ақида мәселесі ислам ғылымдарының ішіндегі ең маңыздысы болып саналады. Сонымен қатар Алла Тағала өз елшілері мен пайғамбарларына ең әуелгі үйреткен білімі де осы – ақида ғылымы. Бұл ғылым – барлық ғылымдардың төресі. Исламдағы наным-сенімге қатысты барлық мәселені қамтитын ғылымды ислам ғұламалары "ақида", "усулуд-дин", "таухид", "иғтиқад" деп атаса, мәзһабымыздың ұлы имамы Әбу Ханифа "Фиқһул-Акбар" (түсініктердің ұлысы) деген атау берген. Біздің де бүгінгі қысқаша баяндайтын мәселеміз осы ғылымның бір тұсы болмақ. Себебі, қазір интернет әлемі қатты дамып, әлеуметтік желілерде түрлі ағымдардардың наным-сенімдері кеңінен тарап, қол жетімді болып кетті. Бұл жағдай қаракөз қазақтарымыздың да сенімдеріне кері әсерін тигізіп, селкеу түсірмей қоймасы анық. Осы орайда ақидамызды жіті түсіну маңызды орынға ие екенін айтқымыз келеді.
Енді, ақида ғылымының басында ең әуелі Аллаға иман келтіру тұрғандықтан, осы мәселеге қысқаша тоқталсақ.
Алла бар. Алладан басқа ешқандай құдай жоқ. Алланың бар болуының бастауы жоқ, өзгеріске ұшырамайды және соңы да жоқ. Алланың бар болуы өздігінен. Алла барлық жаратылғанның жаратушысы. Жаратушы мен жаратылыстың арасында ешқандай ұқсастық жоқ. Алла Тағала барлық кемел сипаттарға ие, пәк және кемшілік сипаттардан ада. Алла Тағала мұңсыз, ешбір жаратылысқа мұқтаж емес, керісінше күллі жаратылыс Аллаға мұқтаж. Алла мәңгі тірі, өлмейді. Барлық жақсылық Алланың қолында. Алла шексіз күш пен қуат және құдірет иесі. Оның құдіреті барлық нәрсеге жетеді. Алла естиді, көреді және сөйлейді. Бірақ, Алла Тағала есту, көру және сөйлеу үшін белгілі бір ағзалар мен құралдарға мұқтаж емес. Керісінше, жаратылыс көру үшін көзге, есту үшін құлаққа және сөйлеу үшін ауыз, тіл, дыбыс және әріптерге мұқтаж. Алланың сөзі жаратылмаған. Алла қалаушы. Қалаған нәрсесі толық орындалады.
«Алласыз алма жерге түсіп, Құдайсыз қурай сынбайды»...
Кімде-кім ғұламаларымызды Құран мен сүннетке негізделген Алла Тағалаға иман етуге қатысты осы ережелерді ұстанып, шынайы сеніп, иланса адасудан амандықта болады. Әрі екі дүние бақытына қол жеткізеді. Жүрегі тыныштық тауып, жаны жадырап, сеніміне селкеу түспейді.
Алла Тағала баршамызды сенімдегі және басқа да амалдардағы адасудан сақтап, Өзі талап еткен деңгейде иман келтіруімізді нәсіп етсін!
Жанболат САПАШОВ,
«Орбита-3» мешітінің бас имамы