Таң намазын жіберіп алудың 6 себебі

Ояна салып, жұмысқа/университетке/мектепке дейін 30-ақ минут қалғанын шошына сезінесіз, онымен қоймай, сіз әлі таң намазын оқыған жоқсыз! Бұл не? 2 минут бұрын ғана көзіңіз ілінген сияқты еді. Ал енді үйдің ішінде әрлі-берлі сенделіп жүгіріп жүрсіз, асығып тісіңізді тазалайсыз, жуынасыз.

Кәне, басын ашып алайықшы. Неге соңғы күндері таң намазын жіберіп алуды жиілеттіңіз? Намазды енді бастап дағдыланып жүрген кезіңізді есіңізге түсіріңізші: таң намазына бір сағат қалғанда оянатынсыз, Кийям әл-Лейлге (түнгі намазға)  тұратынсыз. Ал бүгін, қазір және осы жерде, асығып жуынып жүрсіз, әлі таң намазын оқыған жоқсыз ба? Не дұрыс емес?

6. Түннің жарымында ұйқыға жатамыз

Кең таралған пікірге қарамастан, түн жарымында ұйықтаған «ерте жатқан болып» табылмайды. Бұл адамдардың үлкен сұранысына ие әртүрлі ойын-сауықтарға толы қазіргі әлемнің маңызды мәселесі. Бұрынғы заманда адамдар күннің шығуымен оянып, күн бата салып ұйқыға жататын (сол кезде тәуліктің осы уақытында қараңғыдан қорқудан басқа іс болмайтын). Бірақ бүгінде ғаламтор, теледидар, ұялы телефондар сияқты алаңдатушы факторлардың көптігі сондай, біз тіпті ұйықтайтынымызға қуанамыз! 

Қайғылы шынайылық мынада, біздің көбіміз «түннің жарымынан кейін бірден» ұйқыға кетпейміз, тек түнгі сағат екіде ғана. Бұл біздің шамадан тыс тәкаппарлығымыз болып табылады, егер біз ұйқыға түннің жарымында жатсақ, бұл біз үшін «ерте» болып есептеледі.

Егер біз тақуа адамдардың өмірін зерттеп бастасақ, онда олардың түннің бір бөлігінде тұрып түнгі намазды оқу үшін ерте жататын әдеттерінің болғанын байқаймыз, дұрысы - бірден  құптаннан кейін ұйқыға жату.  Алла Елшісінің (оған Алланың игілігі мен сәлемі болсын) хадистері бізге құптан намазынан соң сөйлесудің орынсыз екендігін үйретеді.

Жалпы алғанда, таң намазына сергек болып ояну үшін, телефоныңызды шетке ысырып қойып, жатар алдын бір стақан сүт ішіп алыңыз.

5. Қоңыраулы сағаттармен болатын қиындықтар

Өтінемін, тағы бес минут… таныс жағдай ма?

Сізге қоңыраулы сағат шылдырлаған кезде тұруға үйрену қажет.  Иә, тағы да ұйықтай тұрсаң, ұйқы тәтті, рақатқа толы, бірақ бұл амал іске аспайды. Сізге ұнаса да, ұнамаса да (дегенмен, әдетте жоқ) қоңыраулы сағат сіздің оянуыңызға көмектеседі, қулықтың бәрі оны қажет уақыттан 10 минут бұрынға қоюда.  Қоңыраулы сағаттың таймерін керек уақыттан 40 минут бұрынға қоюдың қажеті жоқ, өйткені сізге тұруға әлі ерте екеніне көзіңізді жеткізу үшін ғана оянасыз, ал сізді ұйқы қайтадан басады.

4. Түнге қарай тойып тамақ жеу

Мен тағамды емес, ол мені жақсы көреді!

Адамдардың көбі бұның ұйқыға әсер ететінін білмейді –  соңы шырт ұйқыға алып келеді. Зерттеулер көрсеткендей, асқазаны толы адамдар, асқазаны бос адамдарға қарағанда жақсы (шырт) ұйықтайды.
 

Менің кеңесім ашығу емес, түнге қарай желінетін астың көлеміне ұқыпты болу, өйткені ол сізге таң намазына оянуға көмектеседі.  Сонда, ешкім де сіздің тағаммен қарым-қатынасыңызға кедергі келтіре алмайды.

3. Кийям әл-Лейлге (түнгі намазға) тұрып, қайтадан ұйықтап, таң намазын жіберіп алу

Негізінде түнгі намазға тұру – сүннет, бірақ егер оны оқимын деп тұрсаңыз, қайтадан ұйқыға жатпаңыз. Шайтанның айласы сізді: абзал амалды орындаймын деп, парыз амалды қаза қылдырмасын. 

Мұндай жағдай амбицияға толы жас адамдардың тәжірибесінде жиі кездеседі, олар бір түнде Әбу Бәкр ас-Сыддық бола қалғылары келеді. Бірақ нәтижесінде адамның бар қол жеткізетіні – оның құлағына шайтан кіші дәретке отырады және алты жұлдызды қонақүйге орналасқандай оның мұрнына қоныс тебеді (осы хадисті қайта оқып шығыңыз).

Егер сіз тәһажуд намазын оқығыңыз келсе, таң намазын жіберіп алмайтындай бар жағдайды жасаңыз. Одан кейін ұйқыға жатпаңыз – мысалы, таң намазына жарты сағат қалғанда тұруыңызға болады. 

Бастысы – тәһажуд пен таң намаздарының арасында ұйқыға жатпау.

2. Істің шынайы күнәлылығын түсінбеу

Бір қызығы, ұшақты күтіп бір-екі сағат отыра аламыз, ал құлшылық етуге келгенде – оны ең соңына дейін қалдыра береміз. Құлшылық ету мәселесіне аса жеңілтектікпен қараймыз: 

«Мен кейін құлшылық етемін», «Қазір менің уақытым жоқ!» - бұл ең көп таралған «сылтаулар». Бірақ, оғаштығына қарамастан, егер біздің ұшуымыз түнгі сағат 3-те болса, ұшақтан қалып қалмас үшін біз мүлде ұйықтамаймыз. Бұл жағдайда сіз «Мен басқа рейспен ұшамын» немесе басқа да осыған ұқсас қисынсыз сылтауларды ешкімнен естімейсіз.

Мұндай екіжүзділік қайдан келген?  Мәселе Исламға қатысты болғанда, неге біз өзімізге сылтаулар мен ақталулар ойлап табамыз да, ал дүниелік өмірдің барлық шарттарына икемделе кетеміз?  Мен дұрыс айтпасам, мені түзетіңіздер, бұл – біздің әлі де мұның қаншалықты күнә екендігін толық түсінбеуімізде. Мешіттердегі дәрістерге қатысып, діни уағыздарды тыңдау және т.б. амалдарды жасау арқылы өз иманыңызды нығайтыңыз,  тек сонда ғана сіз келер өмірге шын мәнінде күш салған болып есептелесіз.

1. Күні бойы күнәлар жасау

Бұл таң намазын жіберіп алуымыздың ең басты себебі.  Бізге игі амалдар жасауға тауфиқ беріледі деп қалай күте аламыз, егер бар жасайтынымыз тек күнә ғана болса? Намаз – Исламның екінші тірегі және адамның имандылығына тікелей әсер етуші. Бұл мәселенің маңыздылығын түсіну үшін, көптеген аяттар мен хадистерді дәйексөз ретінде келтірудің қажеті жоқ. Бұл жалпы ислам қағидаты: игі амалдар басқа игі амалдарды тудырады, ал жаман амалдар басқа жаман амалдарды тудырады.

Егер біз расымен де Аллаға жақындағымыз келсе, онда біз күні бойы күнә жасамауға бар күшімізді салуымыз керек. Мені дұрыс түсініңіздер, әрине, біз періште емеспіз. Бірақ егер Алла намаз сендерді күнә жасаудан тияды десе, ал біз керісінше оған жігерлене кедергі келтіретін болсақ, онда бұл қайткеніміз?