ҚАДІР ТҮНІНДЕ ҚАЖЫЛЫҚҚА ЖОЛДАМАЛАР ТАБЫСТАЛДЫ
Қадір түні қарсаңында Алматы қаласының бас имамы Төлеби Оспан бірқатар мешіттердегі іс-шараларға қатысты.
Атап айтсақ, Түрксіб ауданы Фирали Ферғанұлы мешітінде қадір түнінде жамағатпен жүздесіп, қадір түнінің қасиеті жайлы уағыз-насихат айтты. Ал Медеу ауданы «Райымбек батыр» мешітіндегі іс-шарада Құран хатым дұғасын жасады. Сонымен қатар мешіт жанашары, ақсақал Қамал Жұманұлына ҚМДБ «Тауаф» қажылық компаниясының қолдауымен Ұмра сапарына жолдама табысталды. Сондай-ақ осы мешітте он жылға жуық имамдық қызмет атқарып келе жатқан Ғалымжан Әбділдаұлына «Тауаф» қажылық компаниясымен кіші қажылыққа жолдама сыйға берілді.
Түннің жарты бөлігінде бас имам Наурызбай ауданы «Әбу Бәкір» мешітіне барып, жамағаттты қадір түнімен құттықтады. Ел амандығы мен тыныштығы үшін бата жасап, мешіттің бас имамы Бақытжан Көптілеуовке «Тауаф» қажылық компаниясы арқылы үлкен қажылыққа жолдама сыйлады. Сонымен қатар қариларға 2 000 000 теңге қаржылай сертификаттар және аудандағы «Балдыгүл ана» қарилар дайындау орталығына 500 000 теңге қаржылай сыйақы табыстады. Аталмыш аудандағы келесі құлшылық үйі «Мұхаммед әл-Әмин» мешітінде бас имам қатысуымен Құран хатым дұғасы оқылып, «Нұр-Мүбарак» университетінің студентіне ҚМДБ гранты мен Ұмра қажылығына жолдама табыс етілді.
Келесі жоспарлы іс-шарада шаһардың бас имамы Төлеби Дәділұлы Әуезов ауданы «Ақсай» мешітіндегі Құран хатым дұғасына қатысып, жамағатпен ел іргесінің амандығы мен қала халқының тыныштығы үшін дұға оқып, бата жасады.
Қасиетті қадір түнінде Қазақстан мұсылмандары діни басқармасының ресми «Тауаф» қажылық компаниясы арқылы бір үлкен қажылыққа, үш кіші қажылыққа жолдама беріліп, 4 500 000 теңге қаржылай сый жасалды.
Алла Тағала қасиетті түн құлшылығы мен дұға-тілектерді қабыл етсін!
Тақырып бойынша жаңалықтар
Қызықты тақырыптар
Намаз уақыттары 
.jpg)
