«ОТБАСЫ - БАҚЫТ ҰЯСЫ» ҚЫЗ БАЛАЛАРЫ АРАСЫНДА СПОРТТЫҚ САЙЫС ӨТТІ
ҚМДБ «Әйел-қыздар» секторы Алматы өкілдігі бойынша Алатау ауданы «Әл-Азим» мешітінің ұйымдастыруымен мектеп жасындағы қыз балалардың бір ай ішінде Құранды толық оқып аяқтау құрметіне арналған «Отбасы – бақыт ұясы» атты спорттық жарыс ұйымдастырылды.
Іс-шараның шымылдығы Құран аяттарымен ашылып, «Әл-Азим» мешітінің ұстазы Венера Достанқызы алғысөзінде қатысушылар мен қонақтарға шараның берекелі өтуін тіледі. Ұстаз өз сөзінде отбасылық құндылықтардың маңыздылығын атап өтіп, осындай игі бастамалардың жас ұрпақтың рухани дамуына қосар үлесі зор екенін айтты. Сондай-ақ, ұстаз Жұлдыз Елтаева Құран батасын оқыды.
Жарысқа шәкірттер аналарымен бірге қатысты. Қатысушылардың жалпы саны 50 ге жетіп, бірге әртүрлі спорттық сайыстарда бақ сынап, өздерінің күш-жігері мен шеберліктерін көрсетті. Жарыс соңында жеңімпаздар бағалы сыйлықтармен марапатталды. Шара соңында қатысушылар мен қонақтарға арнайы дастархан жайылып, ас берілді.
Айта кету керек, 2025 жыл ҚМДБ тарапынан «Ислам және отбасы құндылығы» жылы деп жарияланған болатын. Осыған орай ұйымдастырылған іс-шара жас ұрпақтың отбасылық құндылықтарды терең түсінуіне, олардың тәрбиелік маңызын ұғынуына үлкен септігін тигізген қадамдардың бірі болды.
Тақырып бойынша жаңалықтар
Қызықты тақырыптар
Намаз уақыттары 
