«ӘЙЕЛ - АДАЛ ҚОҒАМ ТІРЕГІ» АТТЫ ФОРУМ ӨТТІ
ҚМДБ «Әйел-қыздар» секторы Алматы қаласы өкілдігінің ұйымдастыруымен «Әйел – адал қоғам тірегі» атты рухани-танымдық форум өтті. Аталған іс-шара қоғамдағы әйелдің рөлін айқындау, отбасы құндылықтарын насихаттау және рухани тәрбиені дәріптеу мақсатында ұйымдастырылды.
Форумда қасиетті Құран аяттары оқылып, бата берумен басталды. Іс-шара аясында Әйел-қыздар секторының 10 жылдық жұмысына арналған арнайы бейнеролик көрсетіліп, Алматы қаласының бас имамы Төле би Дәділұлы сөз сөйледі. Сонымен қатар, «Әйел-қыздар» секторының негізгі бағыттары мен атқарылған жұмыстары таныстырылды. Жүргізушілер жиын барысында әйелдің қоғамдағы орны, ананың тәрбиесі мен ұлттық құндылықтардың маңызы жайлы тағылымды ойлар айтып, қатысушыларға рухани әсер мен пайдалы пікір алмасу тіледі.
Форум барысында Қазақстан мұсылмандары діни басқармасы жанынан 2016 жылы құрылған «Әйел-қыздар» секторының бүгінгі таңда еліміздің рухани кеңістігінде өзіндік орны бар үлкен институтқа айналғаны атап өтілді. Қазіргі уақытта сектор республика бойынша 20 өңірде жұмыс жүргізіп, діни білім беру мен ұлттық тәрбиені ұштастыру бағытында жүйелі жобаларды жүзеге асырып келеді.
Сондай-ақ, «Әжелер мектебі», «Аналар мектебі» және «Қыз-келіншектер» клубтарының қоғамдағы рухани байланысты нығайтудағы маңызы ерекше екені айтылды. Бұл жобалар арқылы отбасы институтын сақтау, ұрпақ тәрбиесін күшейту және қоғамдағы өзекті мәселелердің алдын алу көзделетіні жеткізілді.
Форумда ҚМДБ «Әйел-қыздар» секторының меңгерушісі Динара Құтқожақызы «Шаңырақ шаттығы: Салиқалы жардың сипаты» тақырыбында баяндама жасап, отбасы жарасымы мен әйелдің парасаты жайлы ой бөлісті. Сонымен қатар, ҚМДБ Шымкент қаласы бойынша «Әйел-қыздар» секторының жауапты маманы Балжан Асылханқызы «Мүміндердің аналары – бізге үлгі» тақырыбында, Түркістан облысы бойынша «Әйел-қыздар» секторының жауапты маманы Еңлік Мұратқызы «Отбасындағы кикілжіңдерді сабырмен және даналықпен шешу жолдары» тақырыбында, ал Алматы қаласы бойынша «Әйел-қыздар» секторының жауапты маманы Гүлмира Ілесбайқызы «Ананың дұғасы — баланың қорғаны» тақырыбында мазмұнды баяндама жасады.
Форум соңында қатысушылар қоғамдағы әйелдің орны мен отбасы тәрбиесінің маңыздылығы жөнінде пікір алмасып, мұндай рухани кездесулердің ұлт тәрбиесі үшін маңызы зор екенін атап өтті.
Алматы өкілдігі бойынша баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
.jpg)
