ДІНИ САУАТЫН АШҚАН 850 ШӘКІРТ МАРАПАТТАЛДЫ
«Нұр-Мүбәрак» Египет ислам мәдениеті университетінде ҚМДБ Алматы қаласы бойынша «Әйел-қыздар» секторының ұйымдастыруымен «Ілім жолы – жәннат жолы» атты Діни сауат ашу курсын бітірушілерді марапаттау рухани-танымдық кеші өтті.
Марапаттау кешіне Елордадан арнайы келген ҚМДБ Әйел-қыздар секторының жетекшісі Динара Құтқожақызы қатысып, білім алушы шәкірттерге Бас мүфти Наурызбай қажы Тағанұлының ыстық сәлемін жеткізді. Кеш барысында Алматы қаласындағы 32 мешіттен білім алған әйел-қыздардан құралған 850 шәкірт Құран оқу, әдеп, ақида және сенім бағытындағы сабақтарын аяқтап, арнайы марапатталды. Сонымен қатар, шәкірттердің Құран жаттауға деген ынтасын арттыру мақсатында сыйлықтар үлестірілді.
Іс-шара аясында қатысушыларға арнайы ленталар тағылып, ілім мен рухани тәрбиенің маңызы туралы тағылымды ойлар айтылды. Ұйымдастырушылар мұндай игі бастамалар жастардың діни сауатын арттырып, білім мен адамгершілік құндылықтарды насихаттауда маңызды рөл атқаратынын атап өтті.
Алматы өкілдігі бойынша баспасөз қызметі