АЛМАТЫДА РАМАЗАН АЙЫНА ОРАЙ БРИФИНГ ӨТТІ

Бүгін Алматы қаласының бас имамы Төлеби Дәділұлы Алматы қаласының өңірлік коммуникациялар қызметінде «Рамазан - нұр шашқан ай» тақырыбында брифинг өткізді. 

Рамазан айына орай өткізілген баспасөз мәслихатына Алматы қаласының бас имамы Төлеби Дәділұлы, Алматы қаласы дін істері жөніндегі басқарма басшысының орынбасары Әлімбек Айдарбекұлы, Орталық мешіттің наиб имамы Бауыржан Көптілеуов, «Әл-Ләтиф» мешітінің бас имамы Қанатәли Бақытұлы қатысты.

24 ақпан күні елордада Бас мүфти Наурызбай қажы Тағанұлы БАҚ өкілдерінің қатысуымен баспасөз мәслихатын өткізді. Аталмыш баспасөз мәслихатында биыл Рамазан айы 1 наурызда басталып, 29 наурызда аяқталатындығын жариялады. Наурыздың 26-нан 27-не қараған түн – Қадір түні. 30 наурыз – ораза айт мерекесі. Демек, биыл оразаны 29 күн етіп ұстаймыз. Пітір садақа мөлшері – 655 теңге болып бекітілді.

Бұл даталар – ҚМДБ-ның Шариғат және пәтуа бөлімі Түркия, Әзірбайжан, Өзбекстан, Қырғызстан елдерінің Ғұламалар кеңесімен, пәтуа саласына жауапты ғалымдармен ақылдаса келе бекітілген болатын.

Шаһардың бас имамы Төлеби Оспан: «Рамазан айының алдында Пайғамбарымыз (с.ғ.с) мұсылман жұртшылығына былай деп насихат айтқан: «Уа, адамдар! Сендерге ұлық, берекелі ай келіп жетті. Бұл айда мың айдан артық Қадір түні бар. Алла осы айда ораза ұстауды парыз етті, ал түндеріндегі намазды қосымша құлшылық етті. Рамазанда Аллаға бір ізгі қасиетпен жақындаған жан басқа уақытта парыз амалын орындағанға тең. Ал, парыз амалын орындаған адам басқа уақытта жетпіс парызды атқарғандай (сауап иеленеді). Бұл – сабырлық айы. Ал сабырдың сыйы – жәннат. Рамазан – өзара жанашырлық айы. Ораза айында мүміннің ырзық-несібесі еселенеді...», - деп сүйіншілеген сөзін жеткізді. Сонымен қатар қала бойынша қасиетті рамазан айына орай дайындық жұмыстарын баяндады.

Атап айтсақ, 

Үздік безендіру байқауы

Қасиетті айдың сән-салтанатын арттырып, қала тұрғындарына мерекелік көңіл-күй сыйлау мақсатында Алматыда мешіттері арасында «Рамазан нұр шашқан ай» атты үздік безендіру байқауы жарияланды.

 Байқау шарттары:

1. Рамазан айында мешіт аулаларын безендіру;
2. Безендіру жұмыстарында қазақи нақышты қолдану;
3. Мешіттің ішкі-сыртқы және дәретханасының тазалығын қамтамасыз ету;
4. Мешітте оразаға қатысты ақпараттардың болуы;
5. Ауызашар беретін орындарды безендіру;
6. Байқауға Алматы қаласында орналасқан мешіттер ғана қатыса алады.

Ескерту: Байқауға қатысатын мешіт безендіру жұмыстарын видеоға түсіріп, Алматы Орталық мешітіне жолдайды. Орталық мешіттің «Аzan.kz_1» инстаграм парақшасына видеоны салып, оқырмандардың дауыс беруі мен комиссияның шешімі арқылы жеңімпаз мешіт анықталатын болады.

Ақпараттық-насихат жұмыстары

Президент Қасым-Жомарт Тоқаев еліміздің дамуын айқындайтын жиында дін мәселесін көтеріп: «Халқымыздың дүниетанымына сай дәстүрлі исламды дәріптеу аса маңызды. Оның ғылыми-теориялық негізін дамыту қажет», - деп атап өткен болатын. Осыған орай, қасиетті рамазан айында мешіттерге халықтың көп жиналатындығын ескеріп, дәстүрлі ислам құндылықтарын дәріптеуге арналған дәрістер, ақпараттық түсіндіру жұмыстары жүргізілетін болады.

Сондай-ақ, Рамазан айы наурыз айына тұспа тұс келгендіктен бас мүфти бастамасымен мешіттерде ұлттық бағыттағы бірқатар шаралар ұйымдастырылады.

Бірінші кезекте қалада 28 ақпаннан бастап, «Жарапазан» айту дәстүрі басталады. Мақсат – ораза айында дін мен дәстүрдің сабақтастығын дәріптеп, кенжелеп қалған дәстүрімізді жаңғырту. Мешіттердегі ауызашар кезінде халыққа ұлттық тағамдар ұсынылатын болады. Осы сәтті пайдаланып, барша алматылықтарды ауызашар мәзіріне ұлттық тағамдарды қосуды ұсынамыз.     

Бас мүфти үндеуіне үн қосу

Бас мүфти Наурызбай қажы Тағанұлы хазрет кәсіпкерлерді, сауда орталықтарының басшыларын қасиетті айдың құрметі үшін халқымыздың тұрмыс жағдайын ескеріп, азық-түлік пен түрлі тауарлардың бағасын мүмкіндігінше 10 пайызға дейін төмендетіп, жеңілдік жасауға шақырды. Халқымызда: «Қайырымдылық жасасаң – қайырын өзің көресің», - деген даналық бар.  Сондықтан барша алматылық кәсіпкерлерді осы үндеуге үн қосуға шақырамын.

Рамазан айында мүмкіндігінше құдайы астарды кешкі ауызашар уақытында ұйымдастырылса, нұр үстіне нұр болар еді.

Рамазан оразасы – балиғат жасына толған, ақыл-есі дұрыс, жолаушы емес әрбір мұсылман ер мен әйелге парыз. Бұл оразадан мына кісілер уақытша босатылады. Олар: Жолаушы адам, науқас кісі, емізулі ана, жүкті әйел және әйел кісілердің қонағы келгенде. Ал енді, қарттығына байланысты ұстай алмайтын кісілер мен созылмалы ауруға шалдыққандар мүлде босатылады. Алайда, ол кісілер фидия береді. Егер фидия беруге шамасы жетпесе, пітір садақа мөлшерімен беруіне де болады.

Алматы қаласы дін істері жөніндегі басқарма басшысының орынбасары Әлімбек Айдарбекұлы рамазан айында қала тұрғындары мен мешіт жамағатының қауіпсіздік шараларын сақтап, жол кептелісін болдырмауға шақырды.

Имамдар брифингте БАҚ өкілдерінің оразаға қатысты түрлі сұрақтарына жауап берді.

Алматы өкілдігі бойынша баспасөз қызметі