АЛМАТЫ ЗИРАТТАРЫНА ТАЗАЛЫҚ ЖҰМЫСТАРЫ ЖАСАЛДЫ

Алматы қаласы бойынша ҚМДБ «Qamqor-Sharapat» мекемесінің ұйымдастыруымен шаһардағы зират орындары тазартылды.
Қазақстан мұсылмандары діни басқармасы бастамасымен «Өткенге құрмет-тіріге міндет» атты республикалық тазалық шарасы өткізілді. Сауапты да игі амалға ҚМДБ «Qamqor-Sharapat» ЖШС директоры Мейрамбек Қабылбекұлы, Алматы қаласы «Qamqor-Sharapat» ЖШС филиалының директоры Талғат Дайрабайұлы және қала мешіттерінің имамдары мен жамағаты үлес қосты. Қаладағы сегіз аудан имамдары мен мешіттің дін қызметкерлері, қала тұрғындары мен ерікті жастар әр ауданға қарасты зираттарды қоқыстан тазартты.
Зираттардан шыққан қоқыстар жүк тасымалдау техникаларымен шығарылды. Еріктілер мен қала тұрғындарына ҚМДБ тарапынан қабылданған «Зират және зиярат ету мәдениеті» құжаттары кеңінен түсіндірілді. Марқұмдар рухына Құран оқылып, дұға етілді.
Зират тазалығына қатысқан барша азаматтарға Алла Тағала мол сауаптан жазсын.
Алматы өкілдігінің баспасөз қызметі