Алматы мешіттері алты жарым мың отбасыға 31 тонна ет таратты (ФОТО)
Қасиетті Құрбан айт мерекесіне орай, Алматы мешіттері арасында ұйымдастырылған «Раббың үшін құрбан шал!» қайырымдылық акциясы аясында айт күндері қаланың 8 ауданында 6533 отбасы мен 27 мекемеге 31 тоннадан астам ет таратылып, көмек көрсетілді.
Қаперлеріңізге сала кетсек, Құрбан айттың бірінші күнінде, Айт намазы оқылып болысымен, қаладағы рұқсат етілген орындарда құрбандық шалу рәсімі басталып, құрбандық еттерін тарату жұмыстары жалғасқан болатын.
Содан ҚМДБ-ның Алматы қаласы өкілдігіне қарасты 8 ауданды түгел қамтыған «Раббың үшін құрбан шал!» акциясы биыл да жоғары нәтиже көрсетті.
Қасиетті Құран Кәрімнің «Хаж» сүресінің 28-аятында «Одан өздерің де жеңдер және мұқтаж, пақырларға да жегізіңдер» деп айтылғандай, шарапаты мол айт күндері еліміз бойынша қаншама отбасының қазаны асылып, ауыздары етке тигені көңілге қуаныш сыйлады. Бұның өзі ғибрат көзбен қарағанға Алланың үлкен нығметі екені анық.
Қайырымдылық шарасы аясында құрбандық еттері қаламыздағы тұрмысы төмен, әлеуметтік аз қамтылған, көпбалалы отбасылар мен жалғызбасты аналарға, арнайы тіркеуде тұрған мүгедек жандарға, қарттар мен балалар үйіне көмекке мұқтаж мекемелерге таратылды.
Сондай-ақ, мереке күндері өкілдік тапсырмасы негізінде құлшылық ордаларында түрлі мәдени іс-шаралар ұйымдастырылды. Айт мерекесінің бірінші күнінде Алматы Орталық мешітінің «Әйел-қыздар» секторы «MEGA» пен «Aпорт» сауда және ойын-сауық кешенінде «Құрбан айтта қуаныш сыйла!» атты мерекелік іс-шарасын ұйымдастырды. Шарада түрлі түсті шарлар мен тәттілер, айттық сыйлықтар үлестіріліп, қызықты ойындар ойнатылды. Ал, айттың екінші күні 8 ауданнан құралған «Қайырымдылық керуені» Алматы Орталық мешітінен мұқтаж жандарға жол тартты. Үшінші күні қыз-келіншектер арасында Құранның жүрегі болған «Ясин» сүресін жатқа оқу бойынша жарыс өтті. Дәл осы күні, яғни Құрбан айттың үшінші күні ҚМДБ-ның төрағасы, Бас мүфти Серікбай қажы Ораз хазреттің бастамасымен Алматы Орталық мешітінде «Мектепке жол» қайырымдылық акциясы аясында 1000 балаға мектепке қажетті құрал-жабдықтар салынған сөмкелер мен айттық сыйлықтар табысталды.
Қызықты тақырыптар
Намаз уақыттары 
.jpg)
.jpg)
.jpg)
.jpg)
