Алматы: Бас имам қала тұрғындарын Рамазан айымен құттықтады
Алматы қаласының Бас имамы Еркінбек Шоқай
Ассалаумағалайкүм!
Құрметті қала тұрғындары, қадірлі мұсылман бауырлар!
Баршаңызды айлардың сұлтаны болған қасиетті Рамазан айының кіріп келуімен шын жүректен құттықтаймын. Әрбір отбасыға бақ-береке, ынтымақ-бірлік тілеймін.
Алла Тағала Құран Кәрімде: «Уа, мүміндер! Өздеріңнен бұрынғыларға парыз етілгендей сендерге де ораза ұстау парыз етілді. Бәлкім сол арқылы күнә атаулыдан сақтанып, тақуалыққа жетерсіңдер (Бақара, 183)» - деп айтқан. Шарапаты мол Рамазан айында таңның атысынан күннің батысына дейін бір Алланың разылығы үшін ұстаған оразамызды, ізгі ниетімізді, жасаған қайырымдылық істермізді қабыл етсін.
Бұл - әлемдерге нұр, шипа, рақым болып Құран түсірілген, көптеген сауапты амалдар жасауда жарысатын ерекше ай. Осы ретте, кала мешіттерінің әлеуметтік желі парақшаларында 30 күн бойы қаламыздың білікті қарилары онлайн Құран хатым оқыса, одан бөлек «Құран оқып үйренейік!», «Намаз оқып үйренейік!» сынды онлайн дәрістер өтетінін қаперлеріңізге саламыз.
Алматы қаласы жұқпалы індеттің таралуы бойынша Қызыл аймаққа өтуіне байланысты мешіттерде жамағатпен тарауық намаздары уақытша оқылмайды, ауызашар дастархандары жайылмайды. Алайда, «Берекелі Рамазан тосынсыйы», «Ауыз ашар қоржыны» атты акциялары аясында ауызашар қржындары көмекке мұқтаж отбасыларға жеткізіледі. Амал нешік, Рамазан айындағы құлшылықтарымызды карантиндік талаптарды сақтау мақсатында өз үйімізде өтеуге мәжбүрміз. Бұған түсіністікпен қарап, дұға етіп қоюларыңызды сұраймыз.
Алла елшісі (с.ғ.с.): «Кімде-кім Рамазан айында шынайы сеніммен, сауапты бір Алладан ғана күтіп, ораза ұстаса, бұрын-соңды жасаған күнәлары түгелдей кешіріледі», - деп сүйіншілеген. Рамазанда күнәлары кешірілген, мол сауапқа кенелген күйде төрт көзіміз түгел бейбіт күндерге жете берейік!
Алла Тағала, елімізге амандық, жұртымызға тыныштық нәсіп етсін. Ниетіміз қабыл, мұратымыз асыл болғсын, ағайын!
Қызықты тақырыптар
Намаз уақыттары 
.jpg)
.jpg)
.jpg)
.jpg)
