РӘТБЕК ҚАЖЫ НЫСАНБАЙҰЛЫ ХАЗРЕТТІ АҚТЫҚ САПАРҒА ШЫҒАРЫП САЛУ РӘСІМІ ӨТТІ
Бүгін Алматы Орталық мешітінде Қазақстан мұсылмандары діни басқармасының тұңғыш Төрағасы, 1990-2000 жылдары аралығында Бас мүфти қызметін атқарған елімізге белгілі дін қайраткері, марқұм Рәтбек қажы Нысанбайұлы хазретті ақтық сапарға шығарып салу рәсімі өтті.
Марқұмның жаназа намазын Рәтбек қажының шәкірті, ҚМДБ Төрағасы, Бас мүфти Наурызбай қажы Тағанұлы оқып, қайғы жамылған әулетке сабыр тіледі.
«Рәтбек қажы хазірет – Қазақстан мұсылмандары діни басқармасының ғана емес, халқымыздың үлкен ақсақалы еді. Зиярат етіп барғанымызда әркез халықтың, елдің тілеуін тілеп отыратын. Марқұмның тіршілігіндегі барша ізгі амалдарын Алла Тағала қабыл етсін! Ардақты Пайғамбарымыз (оған Алланың салауаты мен сәлемі болсын):
«Алла Тағала қандай да бір құлына жақсылық бергісі келсе, оны қолданады», – деген. Сонда адамдар: «Уа, Алланың елшісі! Оны қалай қолданады?» – деп сұрайды. Алла Елшісі: «Ол адамға дүниеден өтер алдын ізгі амал атқаруға күш-жігер береді», – деген (имам Термизи).
Хакім Абай:
Көп адам дүниеге бой алдырған,
Бой алдырып, аяғын көп шалдырған.
Өлді деуге сия ма, ойлаңдаршы,
Өлмейтұғын артына сөз қалдырған, – дейді.
Ұстазымыздың жасаған қызметі, істеген ізгі амалы қабыл болып, халқымыздың жадында мәңгі сақталғай. Марқұмның иманы жолдас, жаны жәннаттық болсын!», - деді Бас мүфти.
Сонымен қатар, рәсім барысында Қазақстан Республикасы Президенті Қасым-Жомарт Кемелұлы Тоқаевтың Нысанбаевтар әулетіне жолдаған көңіл айту жеделхаты оқылды.
Сондай-ақ жерлеу рәсімінде бірқатар мемлекеттік тұлғалар мен шет елдердің дін басшыларынан келген көңіл айту жеделхаттары оқылып, марқұмның отбасына табысталды.
Ас соңында ҚМДБ Төрағасының тапсырмасымен еліміздегі Құран жаттау орталықтарында 40 Құран хатым түсіріліп, марқұмның рухына бағышталып дұға жасалды.
Еске сала кетейік, осы апта басында, 12 қаңтар діни басқарманың құрылған күніне орай Бас мүфти Наурызбай қажы Тағанұлы Рәтбек қажы Нысанбайұлы хазретті арнайы зиярат етіп, Ислам дінінің дәріптелуіне, діни білім мен ғылымның дамуына сүбелі үлес қосқан тұлғаларға берілетін ҚМДБ-ның ең жоғары марапаттарының бірі — «Шарапат» орденімен марапаттаған болатын.
Тақырып бойынша жаңалықтар
Қызықты тақырыптар
Намаз уақыттары 
.jpg)
.jpg)
