ТҮРКІСТАНДА «ҚОЖА АХМЕТ ЯСАУИ МҰРАСЫ: ТОЛЫҚ АДАМ ЖӘНЕ АДАЛ ҚОҒАМ» ҒЫЛЫМИ-ПРАКТИКАЛЫҚ КОНФЕРЕНЦИЯСЫ ӨТТІ
Бүгін Түркістан қаласында «Қожа Ахмет Ясауи мұрасы: толық адам және адал қоғам» тақырыбында ғылыми-практикалық конференция өтті. Аталған жиынға Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы және Түркістан облысы әкімінің орынбасары Ертай Кенжебекұлы арнайы қатысты.
Мемлекет басшысы Қасым-Жомарт Тоқаевтың Ұлттық құрылтайдың «Әділетті Қазақстан – Адал азамат» атты 2023 жылғы 17 маусымда Түркістанда өткен екінші отырысында: «Түркістанды Ясауисіз елестету мүмкін емес. Әйгілі ғұлама тұтас түркі дүниесінде ислам дінінің орнығуына зор үлес қосты. Ясауиден бастау алатын қазақ жеріндегі рухани сабақтастық қазірге дейін үздіксіз жалғасып келеді. Биыл Қожа Ахмет Ясауидің туғанына 930 жыл толып отыр. Осы орайда ғұламаның еңбектерін жан-жақты зерттеп, дәріптеу маңызды»,- деп айтқан болатын.
Осыған орай, жиында Қожа Ахмет Ясауи ілімінің рухани-адамгершілік құндылықтары, «толық адам» тұжырымдамасы және адал қоғам қалыптастыру мәселелері кеңінен талқыланды.
«Адалдық – заң талаптарын орындаумен ғана шектелмейді. Ол жеке тұлғаның мінез-құлқынан, еңбекке көзқарасынан, қоғамдық міндеттерге жауапкершілігінен және өзгенің құқығына құрметпен қарауынан көрініс табады.
Биылғы алғашқы конференцияның киелі Түркістан өңірінде өтуі – заңды әрі мәнді шешім. Өйткені бұл өлке – түркі руханиятының темірқазығы, Қожа Ахмет Ясауи ілімінің алтын бесігі.
Біз бүгінгі жиынды Ясауи мұрасындағы толық адам, адал ұрпақ тақырыбына арнадық. Өйткені Ясауи мұрасында адалдық, шынайылық және кемелдік идеялар терең қамтылған»,-деді Бас мүфти.
Конференция барысында ҚМДБ Сарапшылар кеңесінің мүшесі, философия және теология ғылымдарының докторы, профессор Досай Тұрсынбайұлы Кенжетай, ҚМДБ Ғұламалар кеңесінің мүшесі, PhD докторы Мұхитдин Исаұлы, Қожа Ахмет Ясауи атындағы ХҚТУ-дың PhD докторы, доцент Төлегенов Мұхит және ҚМДБ Уағыз-насихат бөлімінің меңгерушісі Батыржан Мансұров ғылыми баяндамалар жасады.
Іс-шара Қожа Ахмет Ясауи мұрасын қазіргі қоғаммен сабақтастыра зерделеуге және рухани кемел қоғам құндылықтарын насихаттауға арналды.
Тақырып бойынша жаңалықтар
Қызықты тақырыптар
Намаз уақыттары 
.jpg)
.jpg)
