АЛМАТЫ МЕШІТТЕРІНДЕ АЛҒАШҚЫ ТАРАУЫҚ НАМАЗЫ ОҚЫЛДЫ
Барша мұсылман үмметі сағына күткен қасиетті Рамазан айы да келіп жетті. Бұл ай – мейірім мен кешірім, сауап пен сабыр айы. Сүйікті Пайғамбарымыз (оған Алланың игілігі мен сәлемі болсын): «Рамазанда иманмен және сауабын үміт етіп түнде (тарауих) намаз оқығанның өткен күнәсі кешіріледі», – деген.
Бүгін Алматы мешіттерінде алғашқы тарауық намазына 32 000 ға жуық адам жиналды. Алматы Орталық мешітінде шаһардың бас имамы Төлеби Оспан Рамазан айының қадір-қасиеті жайлы насихат айтып, жамағатқа Бас мүфти Наурызбай қажы Тағанұлының қасиетті Рамазан айымен құттықтауын жеткізді. Мешіт жамағатына Құран хатымын түсіретін қарилар Ақжолтай қари Бақытжанұлы мен Махмұт Мырзахмет қариды таныстырды.
Сонымен қатар Бас мүфти Наурызбай қажы Тағанұлының бұйырығымен Алматы Орталық мешітінің азаншысы қызметіне тағайындалған Ерлан Битеновті жамағатқа таныстырды.
Е.Битенов 2009-2010 ж.ж. Шымкент қаласы, Шымкент медресесінде қарилықты тәмамдаған. 2014-2018 ж.ж. Шымкент қаласындағы «Отырар» университетінің «Дінтану» факультетін аяқтаған. 2014-2015ж.ж. Түркия елі, Стамбул қаласында құран курсын тәмамдаған.
Ол 2010-2011 ж.ж. Шымкент қаласындағы «Оразкүл ана» мешітінде имамдық қызмет атқарған. 2011-2014 ж.ж. Алматы қаласы «Фирали Ферғанұлы» мешітінде азаншы. 2015-2021 ж.ж. Астана қаласы «Әзіреті Сұлтан» мешітінде азаншы қызметін атқарған. 2021 жылдан бастап, Түркістан облысы, Төле би ауданы, Ленгер қаласы орталық Нұр мешітінде ұстаздық қызметін атқарды.
«Рамазан - кешірім мен сабыр айы. Барша мұсылман қауымына қасиетті Рамазан айы құтты болсын! Алла Тағала ұстаған оразаларыңызды, жасаған құлшылықтарыңызды қабыл етсін!», - деп атап өтті бас имам.
Алматы өкілдігі бойынша баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
