ФОТО: БАС МҮФТИ АЛМАТЫ ЖАМАҒАТЫМЕН ЖҮЗДЕСТІ
Бүгін, Қазақстан Мұсылмандары Діни басқармасының төрағасы, Бас мүфти Серікбай қажы Ораз хазрет Алматы Орталық мешітінде «Қажылықтың хикметтері» тақырыбында жұма уағызын айтты.
Бас мүфти: «Исламның бес тірегінің бірі болған қажылық – Алланың құлдарына берген жақсылықтарға толы зор мүмкіншілігі екені сөзсіз. Тілдік тұрғыда «ұлық тұтқан нәрсеге талпыну», «ниеттену», «оны мақсат тұту» сынды мәнді білдіретін бұл ғибадат түрі – адам баласын ұлы Аллаға жетелейтін, ниетін тек бір Аллаға бағыттап, Оның ғана разылығын мақсат тұттыратын қасиетті құлшылық болып табылады. Сондықтан балиғатқа толған, ақыл-есі бүтін, әлеуеттік мүмкіндігі келіп тұрған әрбір мұсылман баласы, Алланың парыз еткен қажылық сапарын өтеп қайтқаны абзал», – деп сауабы мол ізгі амалға шақырып, мешіт жамағатына рухани нәрлі, жанға азық болатын мәні терең сөздерін жеткізді.
Одан әрі Серікбай қажы Ораз хазрет өз ойын қажылыққа қатысты аят-хадистермен сабақтап, қажылықтың сегіз түрлі даналығына жеке-жеке тоқталды. Мұнымен қоса, қажылықтың қабыл болуы үшін адамның ниетінен бөлек, құлышылық амалдарын қатаң сақтау керектігін де қатаң ескертті. Қажылықтан кейінгі адамның жағдайын айтып, қабыл болған құлышылықтың пайдасымен бөлісті. Сөз соңында, күні кеше қасиетті Мекке жеріне аттанған қажыларымыздың сапарына мешіт жамағатымен тағы да бір сәттілік тілеп, «ел-жұртымыз айдан аман, жыл есен болып, тек жақсылықтарға жете берсін» деп дұға етті.
Келелі уағыздан мешіт жамағаты хикметке толы құлшылыққа деген түсініктерін қалыптастырып, естігендерін бойларына сіңірді.
Алматы Орталық мешітінің баспасөз қызметі
Тақырып бойынша жаңалықтар
Намаз уақыттары 
